АҚШ Россияга қарши божлар тўғрисидаги қонун лойиҳасини музлатиб қўйди

АҚШ Сенати республикачи сенатор Линдси Грэмнинг Россия ва унинг савдо ҳамкорларига нисбатан 500 фоизлик божлар жорий этиш тўғрисидаги қонун лойиҳасини илгари суришни тўхтатиб қўйди, деб хабар берди Politico 14 июл, душанба оқшомида Конгрессдаги республикачилар етакчиси Жон Тюн баёнотига таяниб.

Бу қарор АҚШ президенти Доналд Трампнинг Россиянинг Украинага қарши урушини тартибга солиш ҳақидаги баёнотлари фонида қабул қилинди. «Афтидан, ҳозирда президент бунинг бир қисмини мустақил равишда амалга оширишга ҳаракат қилмоқчи. Агар бирор нуқтада у бу қонун лойиҳасини илгари суриш мантиқан тўғри келади ва унинг музокаралардаги позициясини мустаҳкамлайди, деган қарорга келса, унда биз аралашамиз. Биз тайёр турамиз», — деди Тюн.

«Биз қўлимиздан келганича Оқ уй ва, албатта, Вакиллар палатаси билан стратегияларни мувофиқлаштиришга ҳаракат қиламиз. Шунинг учун бир зумда ҳаракат қилишга тайёр турамиз», деб қўшимча қилди сенатор. Тюн аввалроқ «жуда кучли сигнал» берадиган қонун лойиҳасини қабул қилиш истагини билдирган эди, чунки «европаликлар ҳам АҚШдан етакчилик кутмоқда». У Сенат қонун лойиҳасини август ойидаги танаффусгача қабул қилишига умид билдирганди.

Трампнинг баёнотидан кейин қонун лойиҳасининг АҚШ Вакиллар палатасида илгари сурилиши ҳам даргумон бўлиб қолди. Вакиллар палатаси бу ой танаффусдан олдин санкциялар тўғрисидаги қонун лойиҳасини кўриб чиқадими, деган саволга, Вакиллар палатасидаги республикачилар Стив Скализ: «Ҳозирча йўқ», деди. Шунингдек, у Трампнинг бир томонлама ҳаракатлари алоҳида санкциялар тўғрисидаги қонун лойиҳасини тўлиқ алмаштириши мумкинлигини таъкидлади. «Агар кимдир Путинни музокаралар столига олиб кела олса, бу президент Трампдир», деди у.