Канцлер Мерц Германиянинг НАТОда етакчи бўлишини хоҳлаяпти

Германия канцлери Фридрих Мерц Германиянинг алянсда етакчи рол ўйнаш истагини тасдиқлади. «Келгуси йилларда биз НАТОнинг Европа устунини мустаҳкамлашда етакчи рол ўйнаймиз», деди Христиан-демократик иттифоқ (ХДИ) раиси 9 июл, чоршанба куни Берлинда Германия Шимолий Атлантика иттифоқига қўшилганининг 70 йиллигига бағишланган тантанали маросимда.

Мерц унинг ҳукумати Бундесверни Европа Иттифоқидаги энг қудратли армияга айлантириш учун қўшимча молиявий ресурслардан фойдаланишига ваъда берди, «бу бизнинг катталигимиз ва иқтисодий қудратимизга мос келади ва иттифоқчиларимиз биздан ҳақли равишда буни кутяпти».

Германия мудофаа вазири Борис Писториус ҳам худди шундай фикрда. «Бизнинг иттифоқимиз муваффақиятли қолиши учун европаликлар кўпроқ масъулиятни ўз зиммасига олиши керак. Германия бу борада биринчи ўринда туради», — дея таъкидлади у. Вазирнинг қайд этишича, Россиянинг Украинага қарши агрессив уруши НАТО аҳамияти ҳақидаги барча саволларни олиб ташлаган. «Коллектив мудофаа яна бир бор биринчи ўринга чиқди ва агар керак бўлса, биз НАТО ҳудудининг ҳар бир сантиметрини биргаликда ҳимоя қиламиз», деб ишонтирди у.

НАТО бош котиби Марк Рютте Германиянинг мудофаа харажатларини оширганини олқишлади ва Берлиннинг Европадаги етакчилик бўйича таклифини миннатдорчилик билан қабул қилди. «Германия иттифоқимизнинг ҳаракатлантирувчи кучи. Бизга унинг етакчилиги ва қатъий ҳаракати керак», — деди у.