АҚШ махсус хизматлари собиқ раҳбарлари устидан тергов бошланди

АҚШ Марказий разведка бошқармаси (МРБ) собиқ директори Жон Бреннан ва Федерал қидирув бюросининг (ФҚБ) собиқ директори Жеймс Комига нисбатан жиноий иш очилди. У Россиянинг 2016 йилги АҚШ президентлик сайловига аралашуви иши тергови бўйича содир этилган қонунбузарликлар билан боғлиқ, деб хабар берди Fox News.

МРБ директори Жон Рэтклифф ФҚБ директори Кэш Пателга Жон Бреннаннинг эҳтимолий ҳуқуқбузарлигини исботловчи материалларни топширди, жумладан, Конгрессга ёлғон сўзлагани ҳақидаги. Жеймс Коми ҳам тергов остида, бироқ у нимада гумон қилинаётгани ҳақида батафсил маълумот йўқ. Fox News телеканалининг икки манбаси ФҚБ Бреннаннинг Коми билан муносабатларига «фитна» сифатида қаралаётганини айтди.

Рэтклифф Марказий разведка бошқармасининг ички ҳисоботини эълон қилди, унда у Бреннаннинг 2017 йилги разведка маълумотларига таяниб, Россия президенти Владимир Путин республикачи Доналд Трампга 2016 йилда демократ сифатида президентликка номзод бўлган Ҳиллари Клинтонни мағлуб этишга ёрдам беришга уринаётгани ҳақидаги хулосасини кескин танқид қилган.

Бреннан ва Комига қандай айбловлар қўйилиши номаълум. The New York Times газетасининг ёзишича, тергов умуман айбловга олиб келадими ёки йўқми, ҳозирча аниқ эмас.

АҚШ президенти Доналд Трамп 9 июл куни журналистларга тергов ҳақида матбуотда ўқиганларидан бошқа ҳеч нарса билмаслигини айтди. «Аммо мен сизга айтаман, менимча, улар жуда ноинсоф одам. Менимча, улар жуда инсофсиз. Ва улар бунинг учун жазоланиши мумкин. Менимча, улар ҳақиқатан ҳам ёмон ва инсофсиз одам», деди Трамп.

Оқ уй матбуот котиби Кэролайн Левитт Fox News телеканалига берган интервюсида Бреннан ва Коми тергов қилинаётганидан хурсанд эканини айтди.

АҚШ расмийлари аввалроқ Россиянинг 2016 йилги президентлик сайловига аралашувини текширган эди. Ишга раҳбарлик қилган махсус прокурор Роберт Мюллер Россия сайловга аралашган, аммо Доналд Трамп ва унинг сайловолди кампанияси билан тил бириктирмаган деган хулосага келди. Россия расмийлари ҳар доим сайловга аралашишини рад этиб келмоқда.

2018 йилда АҚШ ҳукумати петербурглик тадбиркор Евгений Пригожин ва «троллар фабрикасига» алоқадор яна 12 кишини 2016 йилги президентлик сайловига аралашишда айблаган эди. 2023 йилда Пригожин «троллар фабрикасини» яратганини тасдиқлади, гарчи унинг вакиллари аввалроқ тадбиркорнинг ушбу тузилмага алоқадорлигини рад этган бўлса-да.