Анорбанк акционери Парижда ўғирлаб кетилди. Тафсилотлар

Ўзбек молия магнати Париж марказида ўғирлаб кетилди, сўнг товон пули эвазига қўйиб юборилди, дея хабар тарқатди Франциянинг Le Monde нашри.

Нашрнинг ёзишича, Анорбанк акциядори Каҳрамон Олимов 23 июн куни Парижнинг 8-туманида ўғирлаб кетилган ва 2 кун тутқунликда ушлаб турилган.

Тадбиркор 21 июн куни котиби билан Тошкентдан Парижга учиб борган – у Францияга тез-тез бориб турган ва бу сафар ҳам француз ҳамкорлари билан учрашиш учун сафар қилган. Бундан ташқари, у кўчмас мулк сотиб олиш бўйича битимни якунлаш ниятида эди.

Ўша куннинг ўзида меҳмонхона барида унинг олдига ўзини Анастасия деб таништирган нотаниш аёл келган. Тахминан 25 ёшлардаги аёл унга рус ва инглиз тилларида гапирган, Туркиядаги гўзаллик салонида ишлашини айтган. Ҳашаматли аксессуарлар – устидаги Louis Vuitton пиджаги ва қўлидаги Tiffany билагузуги эса унинг сўзларига мос келмасди.

Тадбиркор унга телефон рақамини берган, бироқ ўша оқшом яна учрашиш таклифини рад этган. Кейинги куни эрталаб Олимов Анастасия унга деярли тун бўйи хабарлар юборганини кўрган, сўнгра унинг балиқ ресторанида тушлик қилиш таклифига рози бўлган.

Улар меҳмонхонадан бир неча қадам наридаги Жорж Гийомен майдонига етиб келишганда нотаниш шахс томонидан тўхтатилган. Рус тилида кучли «чеченча акцент» билан гапирган бу шахс ва унга ҳамроҳлик қилган икки эркак банкирнинг қўлларини қайириб, микроавтобусга олиб чиқишган. Анастасия эса Олимовнинг полиция чақириш ҳақидаги илтимосини эътиборсиз қолдирган.

Банкирнинг сўзларига кўра, микроавтобус баланд панжарали уйгача бир неча соат юрган. У ерда Олимов ўғрилардан бирини таниган, уни «қонундаги ўғри» ва нуфузли жиноий гуруҳ аъзоси деб атаган.

Унинг айтишича, бу шахс Олимовнинг йирик банкдаги собиқ шериги Б.Р.нинг ишончли вакили ҳисобланади (2017 йилда Олимов «Капиталбанк»да бошқарув раиси бўлиб ишлаган, у ерда унинг 36 фоиздан ортиқ улуши бўлган). Тахминан ўн йилдан бери бу собиқ ҳамкор Олимовни, унинг Туркияга «қувғин қилинган ва вақтинчалик бадарға бўлган» пайтидан фойдаланиб, банкдаги улушини сотиб олганликда айблаб келади.

«Ниҳоят сени тутдик! Сен мендан 10 миллион доллар қарзсан», – деган ўғрилардан бири ва Олимовни урган.

Нашрнинг ёзишича, кейин уч соат давомида калтаклашлар ва осиб ўлдириш инсценировкаси уюштирилган. Шундан сўнг банкирни яна фургонга ўтқазиб, Ниццадаги вилла ертўласига олиб кетишган. Уни «уй кинотеатри»га айлантирилган хонага жойлаштиришган, бу ерда ҳам у калтакланган, таҳдидга учраган, жиноятчилар ҳатто унинг бўйнига тиғ тортишни имитация қилишган.

Ўғирлаганлардан бири Олимовнинг Европадаги активлари ва инвестициялари ҳақида билишини айтиб, тадбиркорнинг фарзандлари ҳақида гапирган ва банкирнинг шахсий котибини ҳам ўғирлаш билан таҳдид қилган.

Охир-оқибат Олимовни 5 млн долларлик қарз ҳақида тилхат ёзиб беришга мажбур қилишган. Тадбиркор ҳайдовчиси орқали Тошкентдаги воситачига 200 минг доллар аванс ўтказиб берган.

Бу илк тўлов Олимовни озод қилиши учун етарли бўлган. Уни Ницца вокзалига олиб боришган, у ердан поездда Парижга кетган ва дарҳол полицияга мурожаат қилган.

48 ёшли банкир тутқунликда қийноққа учрагани айтилмоқда: жабрланувчини 25 июн куни Париждаги Hôtel-Dieu шифохонасида кўрикдан ўтказган шифокор унинг танасида кўкарган жойлар ва яралар борлигини қайд этган. Лекин беморнинг асосий шикояти – ҳаддан ташқари хавотир ва уйқу билан боғлиқ муаммолар бўлган.

Le Monde бу воқени «Парижнинг бой туманларидан бирида юз берган ҳақиқий ўғирлаш ҳодисаси» деб атаган ва «жосуслик романларига хос бундай воқеа»дан француз полицияси ва прокуратураси «ҳайратдан ёқа ушлаб қолгани»ни қайд этган.

Франция полицияси ҳолат юзасидан «гуруҳ бўлиб, шахсни ноқонуний ушлаб туриш» моддаси билан жиноят иши қўзғатган ва «турк миллатига мансуб» бир гумонланувчи қўлга олинган.

Олимов сўроқдан сўнг дарҳол Тошкентга қайтиб, ўз хавфсизлигини таъминлаш учун қўриқчи ёллаган. Бироқ, нашрнинг ёзишича, ўғриликнинг тахминий ташкилотчиси унга Telegram орқали таҳдид ва талаблар юборишда давом этмоқда. 

Манбада ёзилишича, Қаҳрамон Олимов Нидерландияда рўйхатдан ўтган компания орқали Франциянинг EDF компанияси билан ҳамкорликда Сурхондарё вилоятида газ циклли электр станцияси қурилишида иштирок этмоқда. У Парижга айни шу лойиҳа сабабли борган, француз ҳамкорлари билан учрашишни режа қилган. 21 июнда Тошкентдан учиб, эртасига Парижга қўнган инвестор 9 кечага жой банд қилинган Sofitel Arc-de-Triomphe меҳмонхонасига жойлашган.

Маълумот учун, Қаҳрамон Олимов – Анорбанкнинг асосий акциядори, банк кузатув кенгаши аъзоси ҳисобланади. Бу банкнинг активлари 2025 йил 1 январ ҳолатига 10,1 триллион сўмга етган. 2024 йилда банк активлари 2 баробардан кўпроққа – 5,7 трлн сўмга ўсган.