Трамп TikTok учун харидорлар топганини маълум қилди

Доналд Трамп TikTok учун «жуда бой инсонлар гуруҳи»дан иборат харидорлар топгани ва сотув амалга оширилиши учун ХХР раиси Си Жинпингнинг розилиги талаб этилишини маълум қилди.

«Айтганча, бизда TikTok учун харидор бор. Ўйлайшимча, менга Хитойнинг розилиги керак ва раис Си афтидан, буни амалга оширади», — дейди Трамп Fox News бошловчисига.

Апрель бошларида эса Трамп ушбу муддатни яна 75 кунга узайтирди. АҚШ президентининг сўзларига кўра, унинг маъмурияти «TikTokʼни қутқариш бўйича битим устида тинмай ишлаяпти».

Трамп бошқа ҳеч қандай тафсилотларни ошкор этмади. Шунингдек, у харидорлар исмини ҳам айтмай, бу ҳақда «тахминан икки ҳафатадан кейин» маълумот беришини билдирган.

2024 йил баҳорда АҚШ вакиллар палатаси TikTok Хитойнинг ByteDance компаниясидан ажратилмаса, мамлакатда ушбу ижтимоий тармоқни тақиқлаш имконини берадиган қонунни маъқуллаган эди. Конгрессменларнинг ҳисоблашича, TikTok миллий хавфсизликка таҳдид уйғотади, чунки Хитой ҳукумати ByteDance’ни илованинг америкалик фойдаланувчиларига оид маълумотларни беришга мажбурлаши мумкин. Апрел ойида ҳужжат АҚШ президенти Жо Байден томонидан имзоланган, январ ойида, Трамп инаугурациясидан олдин эса АҚШ Олий суди мазкур қонунни қўллаб-қувватлаган эди.

20 январ куни ўтказилган инаугурациядан кейин Трамп АҚШ бош прокурорига қонуннинг кучга киришини 75 кунга кечиктиришни буюрди. У TikTok ўз акцияларининг 50 фоизини Америка компанияларига топширса, АҚШ ҳудудидаги фаолиятини давом эттириши мумкинлигини маълум қилган эди.

Апрел бошларида эса Трамп ушбу муддатни яна 75 кунга узайтирди. АҚШ президентининг сўзларига кўра, унинг маъмурияти «TikTokʼни қутқариш бўйича битим устида тинмай ишлаяпти».