Зеленский Буюк Британия қироли билан учрашди

Украина президенти Володимир Зеленский 23 июн куни Британия қироли Чарлз III билан учрашди, деб ёзмоқда Reuters.

Қайд этилишича, уларнинг жорий йилдаги учинчи учрашуви Виндзор саройида бўлиб ўтган. Шунингдек, Зеленский Британия бош вазири Кир Стармер, парламентнинг ҳар икки палатаси спикерлари Линдси Хойл ва лорд Жон Макфол билан ҳам учрашув ўтказади.

«Бугун Британияга ташрифим чоғида ҳамкорлар билан анча кучли умумий ҳимоянинг асосига айланиши керак бўлган мудофаамиз ҳақида суҳбатлашаман. Шунингдек, бу уруш учун Россияга босимни кучайтириш, ҳужумларни тўхтатиш мақсадида янги ва қатъий чоралар ҳақида келишувларга эришамиз», - деб ёзади Украина президенти ижтимоий тармоқлардаги саҳифасида.

Зеленский 24 июн куни Нидерландия қироли НАТО етакчилар учун ташкил этаётган расмий кечки овқатга ташриф буюриши кутилмоқда. Унда АҚШ президенти Доналд Трамп ҳам қатнашиши мумкин.

Эслатиб ўтамиз, Володимир Зеленский қирол Чарлз III билан март бошларида учрашган эди. Бу Зеленский Оқ уйда Трамп ва вице-президент Жей Ди Вэнс билан тортишиб қолганидан кейин юз берганди. Шунингдек, Чарлз III ва Зеленский Освенцим концлагерининг озод этилганига 80 йил тўлиши муносабати билан ташкил этилган тадбирда ҳам учрашган эди.