ТМК – Ўзбекистонни критик минераллар глобал бозорида трендга чиқармоқда

Дунё камёб ер элементлари учун рақобатга киришган бир вақтда, Ўзбекистон ўз стратегик позициясини яна бир бор мустаҳкамлади. Канадада бўлиб ўтган Камёб ер элементлари уюшмасининг халқаро анжуманида Ўзбекистон технологик металлар комбинати (ТМК) ҳам иштирок этиб, расмий аъзоликка қабул қилинди ва мамлакатимиз дунёнинг энг йирик камёб ер металлари саноати тармоғига қўшилди.

Дунёни қизиқтирган камёб ер элементлари нега бунчалик муҳим?

Камёб ер элементлари (Rarе Earth Elements) – бугунги замонавий технологиялар инфратузилмасининг юраги ҳисобланади. Электр транспорт воситалари, смартфонлар, ҳарбий технологиялар, шамол турбиналари, сунъий йўлдошлар, яримўтказгичлар ва ҳаттоки квант компютерларининг ишлаб чиқарилишини айнан ушбу элементларсиз тасаввур қилиб бўлмайди.

Ўзбекистоннинг REIA таркибига кириши нимани англатади?

Камёб ер элементлари уюшмаси – 2019 йилда Брюсселда ташкил этилган бўлиб, асосий вазифаси – глобал камёб ер элементлари (RЕЕ) таъминот занжирини барқарор, изчил ва экологик жиҳатдан масъулиятли тарзда шакллантиришдир. Унинг аъзолари орасида АҚШ, Канада, Япония, Европанинг етакчи технологик компаниялари, илмий-тадқиқот институтлари ва йирик инвестиция фондлари мавжуд. Ўзбекистоннинг мазкур ассоциацияга аъзо бўлиши – мамлакатнинг камёб ер элементлари бўйича глобал қиймат занжирига чуқур интеграциялашаётганини ифодалайди. 

–      Бизнинг уюшма бу бирлашиш, ҳамкорлик ва ўзаро ишонч асосида “бир плюс бирни учга айлантира оладиган” шериклик алоқаларини йўлга қўйиш платформасидир. Айнан шундай қадриятлар орқали биз ТМК билан ҳамкорликда ишлаб, камёб ер элементлари соҳасидаги глобал жараёнда керакли позицияни эгаллашига кўмак берамиз, – дейди уюшма бош котиби Гарет Ҳатч.

Бу аъзолик нафақат илғор технологиялар ва экологик стандартлар трансферини жадаллаштириш, балки Ўзбекистон технологик металлар комбинати (ТМК) учун халқаро кооперациялар, қўшма илмий-амалий лойиҳалар ҳамда халқаро инвестицияларни жалб этиш йўлида муҳим аҳамият касб этади.

Анжуманда ТМК дунёнинг 15 дан ортиқ йирик компаниялари билан учрашувлар ўтказди. Energy Fuels (AҚШ), JOGMEC (Япония), Saskatchewan Research Council (Канада), Neo Materials каби саноат гигантлари билан илмий-тадқиқот, технология трансфери ва қўшма лойиҳалар юзасидан музокаралар олиб борди. Бу учрашувлар Ўзбекистоннинг камёб ер металлар бозорида глобал ўйинчига айланиш йўлида муҳим босқич бўлди. Шунингдек, Канададаги энг нуфузли университетларидан бири МcGill университети билан ҳам музокаралар олиб борилиб, Технологик металлар олий мактаби бўйича ҳамкорлик қилишга келишиб олинди. 

Халқаро уюшмалар ТМКни танламоқда!

ТМК бугунги кунда критик минераллар йўналишига оид бир қатор уюшмаларга аъзо бўлмоқда. Хусусан, жорий йилнинг март ойида Халқаро волфрам саноати ассоциацияси (ITIА)га, апрелда Европа графит ва углерод материаллари уюшмаси (ECGА) аъзолигига қабул қилинган эди.

– Агар биргаликдаги ҳамкорлигимиз изчил давом этса, бу Европа Иттифоқи учун стратегик ресурслар таъминотида муҳим ўрин эгаллайди. Ушбу платформа технологик тараққиёт, саноат интеграцияси ва билим алмашинуви борасида катта имкониятлар яратади, – дейди Европа графит ва углерод материаллари уюшмаси бош котиби Корина Ҳебештрейт.

Ўзбекистоннинг бундай йирик ассоциацияларга аъзо бўлиши – мамлакатнинг Марказий Осиё миқёсида критик минераллар соҳасида чемпионлик сари дадил қадам ташлаётганини англатади.

Реклама ҳуқуқи асосида