Беларус мухолифати вакили Сергей Тихановский қамоқдан озод этилди

Беларусда 14 нафар сиёсий маҳбус, жумладан Светлана Тихановскаянинг турмуш ўртоғи Сергей Тихановский қамоқдан озод этилди, деб хабар берди Meduza.

АҚШ махсус элчиси Кит Келлогнинг ёрдамчиси Жон Коул ҳам сиёсий маҳбуслар озод этилганини эълон қилди. 21 июн куни Кит Келлог Минскка бориб, Беларус президенти Александр Лукашенко билан учрашди.

«Президент Трампнинг кучли раҳбарияти натижасида бугун Беларусда 14 маҳбус озод этилди. Литва ҳукуматига ҳамкорлик ва ёрдам учун раҳмат — улар ҳақиқий дўст ва иттифоқчи бўлиб қолаверади», деди Коул.

«Наша Нива» хабарига кўра, Тихановский аллақачон Беларусни тарк этган.

Сергей Тихановский 2020 йилда ҳибсга олинди. Шундан сўнг, унинг турмуш ўртоғи Светлана Тихановская Александр Лукашенкога қарши Беларус президентлигига номзодини қўйди. Сайлов натижаларига кўра, Лукашенко ўз лавозимида қолгани маълум бўлгач, мамлакатда норозилик намойишлари бошланди. Шундан сўнг, мухолифат вакиллари таъқибга учради. Тихановская Беларусни тарк этиб, Литвага кўчиб ўтди.

Сергей Тихановский 2021 йил декабр ойида 18 йиллик қамоқ жазосига ҳукм қилинди. У оммавий тартибсизликлар уюштириш, адоватни қўзғаш, Марказий сайлов комиссияси ишига тўсқинлик қилиш каби жиноятларда айбдор деб топилди. Ҳукм Ғарб давлатларининг кескин реакциясига сабаб бўлди: АҚШ, Европа Иттифоқи, Халқаро Амнистия жазони сиёсий сабабларга кўра қоралади.