Нетаняҳу: Исроил зарбалари Эронда ҳокимият алмашишига олиб келиши мумкин

Теҳронда ҳокимиятнинг ўзгариши «албатта, Исроилнинг Эрон ҳудудига берган зарбалари натижаси бўлиши мумкин», чунки «Эрон режими жуда заиф». Бу фикрни Исроил бош вазири Бинямин Нетаняҳу 15 июн, якшанба куни эфирга узатилган Американинг Fox News телеканалига берган интервюсида билдирди.

Нетаняҳунинг сўзларига кўра, Исроил мудофаа кучларининг (ЦАҲАЛ) операцияси Эрондан келаётган иккита «экзистенциал» таҳдид – ядровий қурол ва баллистик ракеталарни йўқ қилишга қаратилган ва Исроил бу мақсадга эришиш учун «қўлидан келган барча ишни» қилишга тайёр. «Биз нафақат ўзимизни, балки бутун дунёни бу ўт қўювчи режимдан ҳимоя қилиш учун ҳаракат қиляпмиз. Биз дунёдаги энг хавфли режим дунёдаги энг хавфли қуролларга эга бўлишига йўл қўя олмаймиз», — дея таъкидлади Исроил ҳукумати раҳбари.

Унинг фикрича, ЦАҲАЛ ҳужумлари натижасида Эрон ядровий дастури аллақачон «сезиларли даражада орқага чекинган». Нетаняҳунинг таъкидлашича, Исроил самолётлари учун Эрон пойтахтига «тўғридан тўғри йўл» очилган ва энди улар «Теҳрон ва бошқа жойларда тўғри нишонларга» зарба бера олади. Исроил ҳарбийлари 14 июн оқшомида Теҳрон ва ғарбий Эрон осмонида тўлиқ ҳукмронлигини эълон қилди.

Шу билан бирга, Нетаняҳу Fox News телеканалига берган интервюсида Исроил АҚШ президенти Доналд Трамп билан «тўлиқ мувофиқлашган ҳолда» ҳаракат қилаётганини айтди.

Трамп 13 июн куни Fox News телеканалига берган интервюсида Исроилнинг Эронга зарба бериш режалари ҳақида олдиндан билганини, бироқ АҚШ бу амалиётда иштирок этмаганини айтди. У жавоб зарбаси берилган тақдирда Қўшма Штатлар ўзини ва Исроилни ҳимоя қилишига ваъда берди, бироқ Теҳрон билан музокара столига қайтишга умид билдирди. Оқ уй раҳбари: «Эрон ҳеч нарсаси қолмаслигидан олдин келишувга эришиши керак», деди.