ЕИ украиналиклар учун вақтинчалик ҳимояни 2027 йил мартигача узайтирди

Белгиланган муддатнинг узайтирилиши Украинадан кўчирилган одамларга сигналдир, дейилади Европа кенгаши баёнотида. Ҳужжатда украиналикларнинг Европа Иттифоқи давлатларидан бошпана сўраши шарт эмаслиги тушунтирилган.

Фото: Arafatul Islam/DW

Европа Иттифоқи кенгаши Россия агрессиясидан қочган 4 миллиондан ортиқ украиналикларнинг вақтинчалик ҳимоясини 2027 йил 4 мартгача узайтириш таклифини бир овоздан қўллаб-қувватлади. Бу ҳақда кенгашнинг 13 июн, жума куни чоп этилган пресс-релизида маълум қилинди.

«Россия Украина фуқароларини пала-партиш ҳаво ҳужумлари билан қўрқитишда давом этар экан, Европа Иттифоқи Украина халқи билан бирдамлик кўрсатишда давом этмоқда. Биз яна бир йил давомида миллионлаб украиналик қочқинларни ҳимоя қиламиз. Полша раислиги ҳам вақтинчалик ҳимояни адолатли тинчлик ўрнатилганидан сўнг босқичма-босқич тугатиш стратегияси бўйича мунозараларни бошлаб юборган», деди Полша ички ишлар вазири Томаш Семоняк.

2022 йилнинг март ойидан бери Европа Иттифоқи Украинадан келган 4 миллиондан ортиқ қочқинларни вақтинчалик ҳимоя қилиш директивасига мувофиқ бошпана билан таъминлаб келмоқда. У 2026 йил 4 мартда тугаши керак эди, аммо энди 2027 йил 4 мартгача узайтирилди.

Вақтинчалик ҳимоя тизими миллий бошпана тизимларига юкни камайтиради, чунки бундай ҳимояга эга бўлган шахслар бошпана сўраб шахсий ариза топшириши шарт эмас. Белгиланган муддатнинг 2027 йилнинг мартигача узайтирилиши украиналикларга бошпана сўрашга ҳожат йўқлигидан далолат беради, дейилади Европа Иттифоқи пресс-релизида.

Узайтириш 2022 йил март ойидаги қарорнинг вақтинчалик ҳимояга эга бўлган шахслар тоифалари ва уларга берилган ҳуқуқлар бўйича шартларини ўзгартирмайди.

#Украина #Европа Иттифоқи #Россия