«Ўзбектелеком» АЖ Humans мобил оператори билан боғлиқ ҳолат юзасидан муносабат билдирди

Компания баёнотида қайд этилишича, Humans 2020 йилдан буён ўз мобил инфратузилмасига сармоя киритмаган ҳолда, «Ўзбектелеком» тармоғи орқали мобил алоқа хизматларини тақдим этиб келмоқда.

«Ўзбектелеком» истеъмолчиларнинг ҳуқуқлари бузилмаслиги учун хизмат кўрсатишни тўхтатмаган, гарчи Humans хизматлар учун тўловларни кечиктирган бўлса-да. Бироқ мавжуд вазият компанияга иқтисодий зарар етказаётгани сабабли, биз судга мурожаат қилишга мажбур бўлдик», – дейилади расмий баёнотда.

Маълумот учун, жорий йил 8 май куни Тошкент шаҳар иқтисодий суди «Ўзбектелеком» АЖ даъвоси бўйича Humans компаниясига нисбатан қарздорлик юзасидан қарор чиқарган.

Шу билан бирга, «Ўзбектелеком» баъзи оммавий ахборот воситаларида компаниянинг бозордаги устун мавқеидан фойдаланиб, Humans’га босим ўтказаётгани ҳақида тарқалган маълумотларни рад этди.

«Ҳеч қандай монопол ҳолат йўқ. Humans бошқа операторлар – Ucell, Beeline, Mobi.uz билан ҳам шартнома тузиб, уларнинг инфратузилмасидан фойдаланиши мумкин. Қонун ҳеч қайси операторга боғлиқликни мажбур этмайди», – дейилади баёнотда.

Компания маълум қилишича, охирги йилларда «Ўзбектелеком» томонидан интернет хизматларини оммавий ва арзон қилиш бўйича жиддий ишлар амалга оширилган. Хусусан, 2017–2024 йиллар оралиғида халқаро интернет каналларининг 1 Мбит/с нархи 40 баробарга арзонлаштирилган.

«Ўзбектелеком» ёлғон ва ҳақиқатга тўғри келмайдиган маълумотлар тарқалишини рад этар экан, келгусида бундай ҳолатлар такрорланса, ўз ишбилармонлик обрўсини ҳимоя қилиш учун судга мурожаат қилиш ҳуқуқини сақлаб қолишини таъкидлади.