Сунъий интеллект томонидан яратилган дори ўпка касаллигини даволашда самара кўрсатди

Бош қароргоҳи Бостон ва Ҳонконгда жойлашган Insilico Medicine биотехнология компанияси сунъий интеллект ёрдамида дори воситалари яратиш соҳасида ютуққа эришганини эълон қилди. Бу ҳақда Bloomberg хабар берди.

Бутунлай сунъий интеллект (СИ) ёрдамида ишлаб чиқилган Рентосертиб дори воситаси бедаво ўпка фибрози бўйича биринчи ўрта босқичдаги клиник синовни муваффақиятли якунлади. Бу касалликда ўпкадаги тўқималарнинг чандиқлари нафас олишни қийинлаштиради.

Хитойда 71 беморни ўрганиш шуни кўрсатдики, препаратнинг энг юқори дозаси беморларнинг кичик гуруҳида ўпка функциясини яхшилади. Биомаркерлар таҳлили препарат СИ прогноз қилганидек ишлаётганини тасдиқлади, унда касаллик ривожланиши билан боғлиқ бўлган оқсил блокланди. Натижалар Nature Medicine журналида чоп этилди.

Insilico Medicine бош директори Алекс Жаворонков бу ўпка касаллигини даволашда «энг яхши натижалардан бири» эканини айтди. Унинг таъкидлашича, анъанавий усуллар клиник синовларга тайёр дори яратиш учун 4,5 йил вақтни олади, Рентосертиб билан эса бу жараён атиги 18 ой давом этди.

Истиқболли натижаларга қарамай, тадқиқот чекловларга эга эди: у атиги 12 ҳафта давом этди, бир нечта беморларнинг аҳволи ёмонлашди, баъзиларида жигарга зарар етказилди. Компания дори самарадорлигини тасдиқлаш учун каттароқ синовларни режалаштирмоқда, аммо назорат идоралари томонидан маъқулланиши учун камида икки йил керак.