Британия Абрамовичдан «Челси»ни сотишдан тушган маблағни Украинага беришни талаб қилди

Британия ҳукумати россиялик олигарх Роман Абрамовичдан «Челси» футбол клубини сотишдан олган 2,5 миллиард фунт стерлинг (3,4 миллиард доллар) маблағни Украинага беришни талаб қилмоқда, деб ёзди Reuters.

Абрамович Россия 2022 йилда Украинага бостириб кирганидан кейин Британия ҳукумати санкциялари рўйхатига киритилди, бу эса унинг Премьер-Лига клубини зудлик билан сотишига олиб келди. Шу билан бирга, клубни сотишдан олинган маблағлар дарҳол музлатилди.

Британия бу маблағлар фақат Украинада уруш оқибатида юзага келган вайронагарчилик ва қурбонлар учун компенсация сифатида сарфланиши кераклигини таъкидламоқда. Абрамович эса кўпроқ мослашувчанликка интилмоқда ва пул «урушнинг барча қурбонларига» (жумладан, россияликларга ҳам) йўналтирилишини истаяпти.

Британия молия вазири Рейчел Ривз ва ташқи ишлар вазири Дэвид Лэмми камдан-кам учрайдиган қўшма баёнот бериб, ҳукумат маблағларни ўзлаштириш учун саъй-ҳаракатларни кучайтиришга тайёрлиги ҳақида огоҳлантирди:

«Ҳукумат «Челси» футбол клубини сотишдан тушган маблағ Россиянинг ноқонуний ва кенг кўламли босқинидан сўнг Украинадаги гуманитар ташкилотларга етиб боришини таъминлашга қарор қилди. Биз жаноб Абрамович билан бу масалада ҳали келишувга эришилмаганидан чуқур хафамиз», дейилади баёнотда.

Уларнинг таъкидлашича, музокаралар учун эшик очиқ, аммо ҳукумат «керак бўлса, суд орқали буни амалга оширишга тўлиқ тайёр».

«Челси»ни сотишдан тушган маблағ Буюк Британиядаги банк ҳисобварағида музлатиб қўйилган ва Молия вазирлиги лицензиясисиз бошқа жойга кўчирилиши ёки фойдаланилиши мумкин эмас.