Экзитпол: Полша сайловларида консерватор Навроцкий етакчилик қилмоқда

Полшадаги президентлик сайловларининг иккинчи босқичида тарихчи Карол Навроцкий Варшаванинг либерал мэри Рафал Тшасковский устидан ғалаба қозонганлиги ҳақида натижалар қайд этилди. Сайловчиларнинг 71,7 фоизи овоз беришда иштирок этди. Марказий сайлов комиссияси овозларни санашда давом этмоқда.

Карол Навроцкий Фото: EPA/ТАСС

Миллий консерватив «Қонун ва адолат» партияси томонидан қўллаб-қувватланган тарихчи Карол Навроцкий Полшадаги президентлик сайловларининг иккинчи босқичида ғалаба қозонди. Буни 2 июн, душанбага ўтар кечаси Полшанинг ПАП ахборот агентлиги, Polsat медиа компанияси, шунингдек, TVN ва TVP телеканаллари томонидан эълон қилинган IPSOS институтининг янгиланган экзитпол маълумотлари тасдиқлайди.

Полшадаги сайлов участкалари маҳаллий вақт билан 21:00 да ёпилди. Янгиланган экзитпол маълумотларига кўра, 42 ёшли Карол Навроцкий 51 фоиз овоз тўпламоқда. Унинг 53 ёшли рақиби, либерал "Фуқаролик платформаси"дан номзод ва Варшава мэри Рафал Тшасковскийни сайловчиларнинг 49 фоизи қўллаб-қувватлади. Сайлов участкалари ёпилганидан сўнг дастлабки дақиқаларда экзитполлар натижалари Тшасковскийнинг (50,3 фоиз) Навроцкийни (49,7 фоиз) ортга қолдираётганини кўрсатди.

Сайловнинг иккинчи босқичида янгиланган маълумотларга кўра, сайловчиларнинг 71,7 фоизи иштирок этди. Аввалроқ сайловчиларнинг қатнашганлик даражасида 72,8 фоизига баҳоланган эди.

18 май куни бўлиб ўтган сайловнинг биринчи босқичида Тшасковский 31,36 фоиз овоз билан ғалаба қозонганди. Навроцкийни сайловчиларнинг 29,54 фоизи қўллаб-қувватлади. Opinia24 институти томонидан 29 май куни эълон қилинган сўнгги сўров натижаларига кўра, иккинчи турда Тшасковскийга 47,4 фоиз, Навроцкийга 46,3 фоиз овоз берилиши тахмин қилинган.

#Полша #Карол Навроцкий