UzAuto Motors Malibu сотувини очганидан бир соат ўтмай шартномалар тугаб қолди

UzAuto Motors Chevrolet Malibu XL автомобили учун қайта контрактация бошланганини эълон қилганидан бир соат ўтмай, шартномалар тугаганини маълум қилди. Бу модел контрактацияси апрел ойи бошида тўхтатилганди.

Фото: UzAuto Motors

UzAuto Motors компанияси 29 май куни соат 14:40 да Сhevrolet Malibu XL автомобили учун контрактация қайта бошланганини маълум қилди.

Компания бугундан бошлаб ҳар бир мижоз автомобилни ўзига ёққан рангда, керакли модификациясида танлаш имконига эгалигини хабар қилди.

Лекин орадан бир соат ҳам ўтмай, соат 15:22 да барча шартномалар якунлангани маълум қилинди. Расмий хабарда нечта шартнома тузилгани очиқланмаган.

Маълумот учун, UzAuto Motors Malibu сотувини апрел ой бошида тўхтатганди.

“Янгиланган” Malibu XL сотуви 2023 йил март ойидан бошланган. Ўшанда компания 3 хил комплектацияда (XL 1LT – 375 млн сўм; XL 2LT –390 млн сўм; XL LTZ – 419 млн сўм) сотувга чиқарилишини эълон қилган. Амалда эса фақат энг қиммат комплектацияни харид қилиш мумкин эди.

Жорий йил апрел ойида ижтимоий тармоқларда автовозга ортилган янги Malibu-2 автомобиллари видеоси тарқалгач, UzAuto Motors бу автомобиллар Хитойдан олиб келинаётганини билдирганди.

UzAuto Motors ҳар бир Malibu-2'нинг устига 10 минг доллар “миндириб” пуллаяптими?

#Malibu #автомобил #UzAuto Motors