Наманганда дарахтга урилган Nexia-3 ёниб кетди. Ҳайдовчи ҳалок бўлди

Наманган шаҳрида 19 ёшли ҳайдовчи бошқарувида бўлган Nexia-3 дарахтга урилиб, ёниб кетди. Ҳодиса оқибатида ҳайдовчи воқеа жойида вафот этди.

Фото: Наманган вилояти ФВБ

Наманган вилояти Фавқулодда вазиятлар бошқармаси Наманган шаҳрида содир бўлган йўл-транспорт ҳодисаси юзасидан маълумот берди.

Қайд этилишича, 26 май куни соат 20:49 ларда Наманган шаҳар Янги аср МФЙ ҳудудидан ўтган 4Р-112 автомобил йўлининг 87-километрида 2006 йилда туғилган фуқаро Nexia-3 русумли автомобилни ҳайдаб кетаётганида бошқарувни йўқотиб, йўлнинг ўнг четига чиқиб кетган ва дарахтга урилган. Натижада, автомашинада ёнғин юзага келган.

Қутқарув экипажи ҳодиса жойига етиб борган, ёнғин қутқарувчилар ва фуқаролар томонидан ўчирилган.

Маълум қилинишича, ёнғин оқибатида автомашина тўлиқ ёниб зарарланган ҳамда ҳайдовчи воқеа жойида вафот этган.

Эслатиб ўтамиз, апрел ойида Тошкентнинг Янгиҳаёт туманида ҳаракатланиб бораётган Isuzu йўл четида тўхтаб турган юк машинаси ортига бориб урилганди. Ўшанда ЙТҲ оқибатида Isuzuʼда ёнғин келиб чиққан ҳамда ундаги икки киши ҳалок бўлган эди.

#Наманган #ЙТҲ