Ҳакамнинг хатоси «Астон Вилла»ни, «Ювентус»нинг пеналтиси «Рома»ни ЕЧЛсиз қолдирди. Кун ўйинлари

Англия: омадли «Нюкасл» ва рекордчи Салоҳ

«Фулҳэм» – «Манчестер Сити» 0:2
Голлар: Гундўған (21), Ҳоланд (72 пен). 
«Фулҳэм»: Лено, Андерсен, Куэнка, Робинсон, Тете, Кэрни (Сессенон 74), Лукич (Берге 86), Перейра (Смит-Роу 62), Уилсон (Ивоби 61), Траоре (Кинг 74), Хименес
«Манчестер Сити»: Эдерсон, Рубен Диаш, Аканжи, Гвардиол, Матеус Нунес, Гонсалес, Гундўған (Де Брюйне 85), Мармуш (Фоден 82), Доку (Савио 74), Бернарду Силва, Ҳоланд (Эчеверри 85)

«Манчестер Сити» охирги тургача ҳам ЕЧЛ йўлланмасини ҳал қилмаганди, аммо ўзи учун қулай рақиб бўлган «Фулҳэм»га қарши сафар учрашувида осон ғалабага эришилди. Гундўған шубҳасиз ўйин қаҳрамони бўлди. Биринчидан, Илкай қайчи услубидаги зарбаси билан ҳисобни очди. Иккинчидан, иккинчи бўлимда Ҳоланд аниқ ижро этган пеналтини айнан у ишлаганди ва шундан кейин ўйин масаласи ҳал бўлди. Хосеп Гвардиола жамоаси мавсумни учинчи ўринда якунлади ва кейинги мавсум Чемпионлар лигасида ўйнайдиган бўлди. «Крэйвен Коттеж»даги ўйин эса АПЛ тарихида бошланғич таркибларда бирорта инглиз футболчиси бўлмаган учинчи ўйин сифатида ажралиб турди.

«Ноттингҳэм Форест» – «Челси» 0:1
Гол: Колвилл (50).
«Ноттингҳэм Форест»: Селс, Мурило, Миленкович, Уилямс, Айна (Жота Силва 83), Сангаре (Ҳадсон-Одои 57), Андерсон, Домингес (Йейтс 68), Гиббс-Уайт, Вуд, Эланга
«Челси»: Санчес, Адарабиойо, Колвилл, Кукуреля, Жеймс, Фернандес, Кайседо, Палмер, Санчо (Лавиа 61), Мадуэке (Дюсбери-Ҳолл 86), Педру Нету (Гюсто 78)
Огоҳлантиришлар: Андерсон 32, Айна 79 – Кайседо 56, Адарабиойо 79

Асосий еврокубокка қайтишни мақсад қилган «Челси»ни эса сўнгги турда максимал даражада мотивацияга эга рақиб кутаётганди. «Ноттингҳэм» мавсумнинг катта қисмида турнир жадвалининг учинчи ўрнида борди ва охирги тур олдидан ҳам Чемпионлар лигасига йўлланма берувчи бешинчи ўриндан умид узмаганди. Аммо кўклар жамоаси иккинчи бўлим бошидаги бурчак зарбасидан кейин тарози палласини ўз томонига оғдирди, ҳужумнинг иккинчи темпида Педру Нету бўш бурчак қаршисида турган Колвиллга тўпни етказиб берди. Ўйинга арбитр томонидан қўшиб берилган дақиқаларда «ўрмончилар» дарвозабони Селс голли узатма муаллифи бўлиши мумкин эди, аммо мезбонларнинг энг яхши тўпурари Крис Вуд қулай позицияда туриб аниқ зарба беролмади. Янги зеландиялик ҳужумчи вазиятдан фойдаланганида, «Ноттингҳэм» Европа Лигаси иштирокчисига айланган бўларди, аммо энди Конференциялар лигаси билан кифояланишга тўғри келади. Энцо Мареска эса олқишларга сазовор: АПЛ тажрибасига эга бўлмаган ҳолдаги илк мавсумида у жамоа билан анча яхши натижа кўрсатди, ҳолбуки бу жамоа турнир тарихидаги энг ёш ўртача таркибдаги жамоадир (24 ёшу 36 кун).

«Нюкасл» – «Эвертон» 0:1
Гол: Алкарас (65).
«Нюкасл»: Поуп, Ботман (Триппиер 63), Берн, Шер, Тонали, Гимарайнс, Ливраменто, Мёрфи (Уилсон 71), Гордон (Уиллок 46), Барнс (Осула 88), Исак
«Эвертон»: Пикфорд, Кин, О`Брайен, Миколенко, Янг, Гейе, Гарнер, Алкарас (Дукуре 76), Ндиай (Макнейл 76), Ҳаррисон, Бету (Калверт-Люин 88)
Огоҳлантиришлар: Шер 38 – Гейе 24, Янг 77, Миколенко 81, Гарнер, 83

«Манчестер Юнайтед» – «Астон Вилла» 2:0
Голлар: Диалло (77), Эриксен (86, пен).
«Манчестер Юнайтед»: Байиндир, Магуайр, Ҳевен (Эванс 67), Линделёф, Бруну Фернандеш, Каземиро, Доргу, Мазравий (Далот 20, Майну 46), Маунт (Эриксен 67), Диалло, Ҳойлунд (Оби-Мартин 81)
«Астон Вилла»: Мартинес, Конса, Пау Торрес, Матсен, Кэш, Онана (Рэмси 63), Камара (Баркли 84), Асенсио (Улсен 45+4), Макгинн (Тилеманс 62), Роджерс (Мален 84), Уоткинс
Огоҳлантиришлар: Диалло 45, Каземиро 90 – Камара 73. Роджерс 81
Четлатиш: Мартинес (45+1)

Ўз уйида «Эвертон»га ютқазган «Нюкасл» онлайн режимда ЕЧЛга йўлланма берувчи ўринлардан қуруқ қолаётганди.

Аммо «қарғалар»га рақобатчиларнинг натижалари қўл келди. Мавсум сўнгида пасайган «Ноттингҳэм»нинг мағлубиятини табиий қабул қилиш мумкин бўлса, «Астон Вилла» «Олд Траффорд»да ўз мақсадига эришиши мумкин эди. Аммо биринчи бўлим охирида Эмилиано Мартинес яккама-якка вазиятга чиқиб келаётган Ҳойлундни жарима майдони ташқарисида йиқитиб, қизил карточка олди.

Меҳмонлар шунда ҳам ғалабани илиб кетиши мумкин эди, аммо 78-дақиқада Роджерс урган гол ҳакамнинг хатоси туфайли инобатга олинмади. Бу вазиятда футболчи рақиб дарвозабонидан тўпни олиб қўйиб, бўш дарвозани ишғол этганди, аммо ҳакам эпизод охирини кутмасдан ҳуштагини чалиб юборди, видеотакрорда эса ҳужумда фол бўлмагани кўринди.

Қолган дақиқаларда эса «МЮ» бирмингҳэмликларни таслим этди. Энди «Вилла» Европа Лигасида ўйнайди, «Нюкасл» мухлислари эса параллел ўйинлардаги натижаларга кўра ЕЧЛ йўлланмасини нишонлади.

«Ливерпул» – «Кристал Пэлас» 1:1
Голлар: Салоҳ (85) – Сарр (9).
«Ливерпул»: Алиссон, ван Дейк, Конате (Нунес 62), Робертсон (Эллиотт 85), Брэдли (Александр-Арнолд 46), Жонс, Гравенберҳ, Собослаи (Диогу Жота 62), Гакпо, Салоҳ, Диас (Эндо 69)
«Кристал Пэлас»: Ҳендерсон, Лакруа, Лерма, Ричардс, Камада, Ҳюз (Эсс 79, Матеус Франса 90+3), Митчелл, Мунос, Сарр, Эзе (Девенни 62), Матета (Нкетиа 62)
Огоҳлантириш: Гравенберҳ 61
Четлатиш: Гравенберҳ 68.

Турнир нуқтайи назаридан «Энфилд»даги ўйинни икки сабаб билан эслаб қолиш мумкин. Биринчидан, муддатидан олдин чемпионликни ҳал қилган «Ливерпул» ва Англия кубогини қўлга киритган «Кристал Пэлас» бир-бири учун чемпионлик йўлакларини ташкил этишди. Трибуналар ва ўйинга шахсан ташриф буюрган Юрген Клопп ҳайратда эди. Иккинчидан, қизилларни мағлубиятдан қутқариб қолган голни урган Салоҳ сермаҳсуллик борасида АПЛ рекордини такрорлади. 47 (29+18) балл билан Мо фақат Энди Коул ва Алан Ширер каби афсоналар амалга оширган ишни уддалади (лекин унга гол+пас бўйича 20+20 кўрсаткичини қайд этган Анрининг рекордини бузиш насиб этмади).

Аммо мисрлик футболчининг ўзи ҳам ноёб кўрсаткичга эришган: ҳали ҳеч бир футболчи бир чемпионатда голлар сони бўйича ҳам, голли паслар сони бўйича ҳам тенгсиз бўлиб, энг яхши футболчи учун совринни қўлга киритмаганди.

Турнир жадвалидаги якуний ҳолат:

Чемпион – «Ливерпул»;
ЕЧЛ иштирокчилари – «Ливерпул», «Арсенал», «Манчестер Сити», «Челси», «Нюкасл», «Тоттенҳэм» (Европа Лигаси ғолиби сифатида);
Европа Лигаси иштирокчилари – «Астон Вилла», «Кристал Пэлас» (Англия кубоги ғолиби сифатида);
Конференциялар Лигаси иштирокчиси – «Ноттингҳэм Форест»;
Чемпионшипга тушиб кетганлар – «Лестер», «Ипсвич» ва «Саутҳэмптон». 

Италия: «Лацио»нинг қулаши ва «Рома»даги драма

А Серия, 38-тур
«Венеция» – «Ювентус» 2:3
Голлар: Фила 2, Ҳапс 55 – Йилдиз 25, Коло-Муани 31, Локателли 73 (пен).
«Венеция»: Раду, Шверко (Маркандалли 77), Канде, Шингтенн, Николусси Кавиля, Эллертссон (Марич 86), Думбия (Ористанио 77), Ҳапс (Перес 68), Дзербин, Йебоа, Фила (Гюткер, 68)
«Ювентус»: Ди Грегорио, Савона, Келли, Кошта (Вейга 46), Локателли, Тюрам, Камбясо (Маккенни 76), Гонсалес (Веа 81), Консейсау (Гатти 86), Кенан Йилдиз, Коло Муани (Влаҳович 76)
Огоҳлантиришлар: Дзербин 53 – Кошта 20, Гонсалес 62

Италияда эса якуний тур олдидан ЕЧЛ учун фақат бир йўлланма тақдирига ойдинлик киритилиши қолганди. Бу курашда асосий фаворит тўртинчи ўринда жойлашган ва асосий таъқибчилари «Рома» ва «Лацио»ни мос равишда 1 ва 2 очколик фарқ билан ортда қолдираётган «Ювентус» эди, аммо туринликлар А серияда қолиш учун сўнгги имкониятидан фойдаланишни мақсад қилган «Венеция»дан иккинчи дақиқадаёқ гол ўтказиб юборди. Тезкор жавоб голи эса бекор қилинди, VAR Алберта Кошта тўпни қўли билан ўйнаганини қайд этди.

Бянконерилар мухлислари биринчи бўлим ўрталаригача ўйинни ҳаяжон билан кузатишди, 25-дақиқада тўп аутдан тезлик билан киритилгач, Кенан Йилдиз ўткир бурчакдан йўллаган зарбаси билан ҳисобни тенглаштирди. Фақат бу етарли эмасди, онлайн режимда «Рома» тўртинчи ўринга кўтарилиб олганди. «Бўрилар» «Торино» майдонидаги ўйинда Паредес пеналтидан урган гол эвазига ҳисобда олдинга чиқиб олишганди. Бир неча дақиқа ўтиб эса Коло Муани жамоасини ҳисобда олдинга олиб чиққач, яна вазият «Кекса синиора»лар томонига ўзгарди.

Аммо иккинчи бўлим бошларида онлайн турнир жадвалида жамоалар яна ўрин алмашишди. «Юве» мудофааси «Венеция»нинг қарши ҳужумига дош беролмади, параллел ўйинда эса Салемакерс римликларнинг иккинчи голини урди ва «Рома» яна бир оёғи билан ЕЧЛда эди. Фақат иккинчи бўлим давомида мезбонларнинг бир неча хавфли ҳужумларидан омон чиққан «Юве» 72-дақиқада амалда интригага барҳам берди. «Юве»дан ижарага олинган Николусси-Ковиля жарима майдонида Франсишку Консейсауни йиқитди, Локателли эса пеналтидан ғалаба голини урди.

«Торино» – «Рома» 0:2
Голлар: Паредес 18 (п), Салемакерс 53.
«Торино»: Милинкович-Савич, Масина (Валюкевич 72), Марипан, Бираги, Дембеле (Перциун 59), Казадеи (Гинейтис 59), Риччи (Линетти, 72), Влашич, Элмас (Габеллини 81), Лазаро, Адамс
«Рома»: Свилар, Манчини, Н`Дика, Зеки Челик (Ренч 90), Кристанте, Паредес (Ҳуммелс 90), Коне, Анхелинио, Салемакерс (Балданци 90), Шомуродов (Ал-Шаъровий 72), Соуле (Пизилли 90)
Огоҳлантиришлар: Марипан, 63 – Зеки Челик, 75

Мавсум ярмида инқироз ҳолатида жамоани қабул қилиб олган Клаудио Раниери мураббийлик фаолиятини «Рома»да чиройли қилиб якунлади. Унинг бошчилигида римликлар 19 учрашувдан иборат мағлубиятсиз серия қайд этди ва ЕЧЛга қайтиши ҳам мумкин эди. Аммо «Аталанта»дан учралган мағлубият нафақат ажойиб серияга барҳам берди, балки жамоанинг ЕЧЛ йўлланмаси учун курашдаги имкониятларини ҳам пасайтириб юборди. Натижада сўнгги икки турдаги ғалабага қарамай, «бўрилар» Европа Лигаси билан кифояланадиган бўлди. ЕЧЛ йўлланмаси учун курашдаги яна бир жамоа «Лацио» эса сўнгги турда «Лечче»га ютқазиб (0:1), еттинчи ўринга қулади ва кейинги мавсум еврокубокларда қатнашмайдиган бўлди. «Фиорентина» эса «Удинезе»ни мағлуб этиб, Конференциялар лигасидаги иштирокини кафолатлади.

Турнир жадвалидаги якуний вазият:

Чемпион – «Наполи»; 
ЕЧЛ иштирокчилари – «Наполи», «Интер», «Аталанта», «Ювентус»;
Европа Лигаси иштирокчилари – «Рома», «Болоня» (Италия кубоги ғолиби сифатида);
Конференциялар Лигаси иштирокчиси – «Фиорентина»;
B серияга тушиб кетганлар – «Эмполи», «Венеция» ва «Монца». 

Испания: басклар афсонаси билан хайрлашув

Ла Лига, 38 тур. 
«Атлетик» – «Барселона» 0:3
Голлар: Левандовски 14, 17, Олмо 90+4 (п).
«Атлетик»: Симон, Де Маркос (Лекуэ 89), Паредес, Нунес (Вивиан 62), Берчиче, Галаррета (Прадос 62), Хуарегисар, Берренгер, Гомес (Сансет 62), Уилямс (Иняки Уилямс 80), Саннади.
«Барселона»: Пеня, Гарсия, Араухо (Кристенсен 64), Кубарси, Балде (Мартин 81), Педри (Де Йонг 81), Гави, Фермин, Ямал, Рафиня (Олмо 64), Левандовски (Виктор 89).
Огоҳлантириш: Берчиче, 75

Билбаода бутун фаолиятини «Атлетик»да ўтказган ва басклар Марсело Биелса бошқаруви даврида Европа Лигасида ўйнаган даврлардан буён мухлисларга яхши таниш бўлган 36 ёшли Де Маркос фаолиятини якунлади. Ушбу фахрий футболчи қадрдон «Сан-Мамес»да соврин ютишни орзу қилганди, аммо «МЮ» бу орзу амалга ошишига йўл қўймади. Мавсумнинг сўнгги турида эса мотивациясиз «Атлетик» «Барселона»га айтарли қаршилик кўрсатмади.

Якшанба кунги ўйинда энг катта иштиёқ Левандовскида эди. Унинг Фермин Лопеснинг узатмасидан кейинги биринчи голи каталонлар клубидаги юзинчиси бўлди. Полшалик ҳужумчи бу кўрсаткичга эришиш учун 147 ўйин етарли бўлди. Бу кўк-анорранглилар тарихидаги энг тезкор натижалар қаторида бешинчиси бўлди, лекин жамоанинг ўтган аср 40-йилларидаги юлдузи Мариано Мартинга етиб ҳам бўлмасди. У 99 ўйиндаёқ юзлик довондан ўтганди. Левандовски якшанба куни биргина гол билан кифояланмади ва бурчак тўпидан кейин «Барса»нинг ҳисобдаги устунлигини оширди.

Иккинчи бўлимда у голлари сонини янада ошириши мумкин эди, аммо иккита қулай имкониятни йўққа чиқарди. Кубарси тўпни ўз дарвозасига йўналтириб юборганида ҳам гол бўлмади, Иняки Пеня тўпга улгурди. Ва фақат ўйин қаҳрамони Де Маркос майдонни тарк этганидан кейин (унинг ла лигадаги фаолияти 2009 йилда «Барса»га қарши ўйин билан бошланганди), Дани Олмо пеналти ишлади ва уни ўзи аниқ ижро этди.

Турнир жадвалидаги якуний вазият:

Чемпион – «Барселона»;
ЕЧЛ иштирокчилари – «Барселона», «Реал», «Атлетико», «Атлетик», «Вилярреал»;
Европа Лигаси иштирокчилари – «Бетис», «Селта»;
Конференциялар Лигаси иштирокчиси – «Райо Валекано»;
Сегундага тушиб кетганлар – «Леганес», «Лас-Палмас» ва «Валядолид».