Илон Маск нега сиёсатдан узоқлашишга қарор қилгани маълум бўлди

Маск сиёсатдан кетиш қарорини шу ҳафта бошида эълон қилди. У келажакда сиёсатга анча кам вақт ажратишни режалаштираётганини ва Tesla компаниясини бошқаришга эътиборни кучайтирмоқчи эканини айтди.

Фото: AP / Matt Rourke

Доналд Трамп маъмуриятида АҚШ ҳукумати самарадорлиги департаментини (DOGE) назорат қилувчи бизнесмен Илон Маск бир қанча сабабларга кўра сиёсий фаолиятни тарк этишга қарор қилди, деб ёзди The Washington Post (WP) манбаларга таяниб. Буларга аниқ натижаларга эришишдаги қийинчиликлар ва ўз хавфсизлиги ҳақида ташвишланиш киради.

Маск сиёсатдан кетиш қарорини шу ҳафта бошида эълон қилди. Қатар Иқтисодий форуми арафасида Bloomberg агентлигига берган интервьюсида у келажакда сиёсатга анча кам вақт ажратишни режалаштираётганини ва 2008 йилдан бери ўзи раҳбарлик қилиб келаётган Tesla компаниясини бошқаришга эътиборни кучайтирмоқчи эканини айтди: «Менимча, етарлича иш қилдим», деб қўшимча қилди у.

WP манбаларининг таъкидлашича, ўтган йил давомида Маскнинг ҳаётида сиёсат марказий ўрин тутган. Аммо сўнгги вақтларда унинг сиёсий иштиёқи сусайган. Ишбилармон ўз маблағларининг Америка сиёсий тизимига қандай таъсир қилишидан ҳафсаласи пир бўлди, деб ёзди газета.

Маскнинг сиёсий фаолиятини қисқартириш қарорига нафақат шахсий харажатлар, балки аниқ натижаларга эришиш қийинлигидан умидсизлик ҳам таъсир қилган, деди манбалар. Маск ўзи ва оиласининг хавфсизлиги ҳақида жиддий қайғурмоқда. Шунингдек, у ўзига ҳам, компанияларига ҳам, жумладан Tesla объектларига қилинган ҳужумларга қаратилган шахсий таъқиб ва норозилик даражасини кутмаган.

NBC News хабарига кўра, Маск DOGE раҳбари бўлгач, Tesla иншоотлари «ҳужумлар тўлқини»га дуч келган. Телеканал маълумотларига кўра, бир неча ҳафта давомида компания автомобиллари, дилерлик марказлари ва қувватлаш шохобчаларига нисбатан ўндан ортиқ вандализм ҳаракати содир этилган. АҚШ президенти Доналд Трамп бундай ҳужумларни уюштирганларни террорчилар деб билишини маълум қилди.

«Капитолий тепалигидаги сиёсат энди самарали эмас. Энди, вақтдан ютганимиздан кейин, келинг, шунчаки Марсга учиш масаласига қайтайлик», деди Маскка яқин манба.

Бойлиги 374 миллиард долларга баҳоланган Маск Доналд Трампнинг 2024 йилги президентлик кампаниясининг энг йирик донорларидан бири бўлди. Ҳисоб-китобларга кўра, у Трампнинг сайловда ғалаба қозонишига ёрдам бериш учун 250 миллион доллардан ортиқ маблағ сарфлаган.

Маскнинг президентга яқинлиги ва унинг DOGE раҳбари сифатида қилган ишлари, жумладан, давлат ходимларини оммавий равишда ишдан бўшатишлари кенг танқидларга сабаб бўлди. Маск сиёсатидан норозилик Tesla компаниясига ҳам таъсир қилди. Агар 2024 йилда компания акциялари сезиларли даражада – 60 фоизга ўсган бўлса, 2025 йил бошидан буён улар 55 фоиздан кўпроқ арзонлашди.

#АҚШ #Илон Маск #Доналд Трамп