«Сити» КДБ билан хайрлашди ва ЕЧЛга яқинлашди

АПЛ, 37-тур
«Манчестер Сити» – «Борнмут» 3:1
Голлар: Мармуш 14, Силва 38, Нико 89 – Жеббисон 90+6.
«Манчестер Сити»: Эдерсон, Рубен Диаш, Аканжи, Гвардиол, Матеус Нунес, Ковачич, Гундўған (Грилиш, 90+2), Де Брюйне (Гонсалес, 69), Мармуш (Доку, 90+2), Бернарду Силва (Бобб, 90+2), Ҳоланд (Родри, 82)
«Борнмут»: Аррисабалага, Ҳаусен, Забарний, Керкез (Солер, 83), Араухо (Смит, 69), Кук, Адамс, Клюйверт (Брукс, 46), Семенё, Таверние, Эванилсон (Жеббисон, 83)
Огоҳлантиришлар: Эдерсон 67 – Ҳаусен 36, Араухо 44, Таверне 88
Четлатишлар: Ковачич 67 – Кук 73.

Мавсум аввалида АПЛнинг 35-турида «Манчестер Сити» ва «Борнмут» ўртасидаги учрашув бирданига беш жамоа учун ҳал қилувчи ўйин бўлишини ҳеч ким тасаввур қила олмасди. Аммо Хосеп Гвардиоланинг фаолиятидаги энг ёмон мавсум барчасини айқаш-уйқаш қилиб юборди, Англия Чемпионлар лигаси учун бешинчи йўлланмага эга чиқиши интригани максимал даражада кучайтирди.

«Этиҳад»даги ўйин бошланганида онлайн турнир жадвалида «Сити» тўплар нисбати яхшилиги ҳисобига «Нюкасл», «Челси» ва «Астон Вилла»ни ортда қолдириб, учинчи ўринга кўтарилиб олди. Шу билан бирга, еттинчи ўринни эгаллаб турган «Ноттингҳэм Форест» билан орадаги фарқ атиги бир очкони ташкил этаётганди.

Лекин вазият тезда фаворит фойдасига ўзгарди. 14-дақиқада Мармуш марказий доира атрофида тўпни қабул қилиб олиб, жарима майдони яқинигача борди ва тахминан 30 метр масофадан зарба йўллади, тўп ақл бовар қилмас траектория бўйлаб «тўққизлик»ни аниқ нишонга олди. Тўп устундан рикошет бўлиб тўрга бориб тушиши гол янада чиройли кўриниш олишини таъминлади.

Англия кубоги финалида пеналтидан фойдалана олмаган мисрлик футболчи учун анча узоқ масофадан гол уриш осонроқ бўлиб чиқди. Ушбу футболчи кўп ўтмай Де Брюйнени жуда қулай вазиятга чиқарди, аммо тажрибали футболчи беш метр масофадан туриб дарвоза тўсинини пойлади.

Ва барибир трибуналар шу куни «Сити»нинг уй аренасида сўнгги ўйинини ўтказаётган белгияликни олқишлашди ва сардор шарафига қўшиқлар куйлашди. Шу билан бирга, у фойдалана олмаган вазият қимматга тушиши ҳам мумкин эди, бироз ўтиб Йошко Гвардиолнинг хатосидан кейин Эванилсонда жуда қулай вазият юзага келди (у бу мавсумда чемпионат ўйинида ҳам, Англия Кубогида ҳам Гвардиола жамоаси дарвозасига гол урган), аммо унинг яқин масофадан йўллаган зарбаси устунга борди. Бир неча дақиқа ўтиб жарима майдони ичига кириб борган Гундўған Бернарду Силвани голли пас билан таъминлади.

Бу гол «Борнмут» учун жиддий зарба бўлди ва иккинчи бўлимнинг катта қисмида меҳмонлар прагматик ўйнашга ўтган «Сити» мудофаасини ёриб ўтиш учун беҳуда уринди. Майдондаги сукутни фақат трибуналарда Де Брюйне шарафига куйланган қўшиқлар бузиб турарди — фанатлар унинг учун «Қирол Кев» сўзлари туширилган ҳашаматли баннер ҳам тайёрлашганди.

Бу акцияга клуб ҳам қўшилди, «шаҳарликлар» академияси ва асосий жамоа машғулот базасини боғловчи йўлга сардорнинг номи берилди.

Де Брюйненинг алмаштирилиши ҳам трибунадагилар ҳиссиётга берилиб қаршилашди. Лекин шу куни мухлисларни хурсанд қиладиган бошқа воқеа ҳам рўй берди, 83-дақиқада Эрлинг Ҳоланд ўрнига Родри майдонга тушди ва бу 2024 йил сентябрида хочсимон пайлари узилиб сафдан чиққан футболчи учун «Сити» сафида саккиз ой ичидаги илк ўйин бўлди.

Бу орада майдонда икки футболчи четлатилди. Аввалига Матео Ковачич олдинга чиқиб кетаётган Эванилсонни ушлаб қолди – Йошко Гвардиолнинг навбатдаги хатоси туфайли рақиб ҳужумчиси дарвозабон билан яккама-якка ҳолатга чиқиб кетиши мумкин эди.

Лекин кўп ўтмай таркиблар тенглашди, меҳмонлар яримҳимоячиси Люис Кук Нико Гонсалесга (у айнан Де Брюйне ўрнига майдонга тушганди) қўполлик учун майдондан четлатилди.

Испаниялик яримҳимоячи том маънода кеча қаҳрамонидан эстафета таёқчасини қабул қилиб олди ва жарима майдони чизиғидан йўлланган айланма зарбаси билан ўйинга нуқта қўйди. Дэниэл Жеббисоннинг ўйинга қўшиб берилган олтинчи дақиқада урган биргина жавоб голи амалда ҳеч нарсани ўзгартирмади.

«Сити» – АПЛда учинчи ўринда. Аммо ҳали ҳам ЕЧЛ йўлланмаси кафолатланмади

Чемпионлар лигасининг 2025/26 йиллар мавсумида Англиядан олтита жамоа иштирок этади. Мавсум якунларига кўра УЕФА рейтингидаги юқори натижалар эвазига АПЛ турнир жадвалидаги дастлабки беш ўринни олган жамоага йўлланма берилган. Европа лигаси ғолиби ҳам кейинги мавсум ЕЧЛ иштирокчисига айланади, финалда эса «Тоттенҳэм» ва «Манчестер Юнайтед» ўзаро ўйнайди.

«Ливерпул» ва «Арсенал» дастлабки икки йўлланмани нақд қилиб бўлишган, қолган уч йўлланма учун эса беш жамоа курашмоқда. Учинчи ўрин ва еттинчи ўриндаги жамоалар ўртасида атиги уч очко бор.

Сўнгги турда турнир жадвалининг юқори қисмида шиддатли кураш кечади:

● «Манчестер Сити» амалда очко керак бўлмаган «Фулҳэм» меҳмони бўлади, бу ўйиндаги ғалаба «шаҳарликлар»ни шубҳасиз ЕЧЛ иштирокчисига айлантиради, дуранг ҳисоб ҳам 99,9 фоизга қониқтиради, бу ҳолатда  тўпланган очколар сони бўйича уч жамоа қувиб етиши мумкин, аммо АПЛда очколар тенг келган ҳолатда биринчи навбатда тўплар нисбатига қаралади, «шаҳарликлар»да эса бу борада «+26» кўрсаткичи юзага келган. Назарий жиҳатдан Гвардиола жамоасини «Нюкасл» (+22 ва уйда «Эвертон» билан ўйин) ва «Челси» (+20, сафарда «Ноттингҳэм» билан сафарда ўйин) ортда қолдириши мумкин. Аммо «Астон Вилла» «+9» кўрсаткичи билан рақобат қила олмаслиги тайин. 

Умуман олганда, барчаси Пеп жамоасининг ўз қўлида.

● «Ноттингҳэм Форест» «Челси»ни қабул қилади, икки жамоа учун ҳам мавсумнинг энг муҳим ўйини. Лондонликлар ғалаба қозонса, ЕЧЛга чиқиши аниқ, дуранг эса рақобатчиларга имкон қолдиради.

● «Астон Вилла» орада Европа лигаси финалида ўйнайдиган ва асосий эътиборини ўша ўйинга қаратадиган «МЮ» меҳмони бўлади. Унаи Эмери шогирдлари ўз ўйинида ғалаба қозониш билан бирга, «Челси» ёки «Нюкасл» очко йўқотишидан умид қилиши керак.

● «Нюкасл» уйда «Эвертон»ни қабул қилади.

АПЛ 38-туридаги барча учрашувлар параллел тарзда ўтказилади: 25 май куни Тошкент вақти билан соат 20:00 да.