Мактаб ўрнига “дом”, 167 жабрланувчи. Тошкентда “новостройкачи”ларга нисбатан йирик суд иши бошланди

Учтепа туманида қурилиши бошланган 8 қаватли уй харидорларига берилган ваъдага кўра 2022 йилнинг декабрида фойдаланишга топширилиши керак бўлган. Аммо бундай бўлмади. 2024 йилнинг сентябр ойида компания таъсисчиси қамоққа олинган. Kun.uz'га берилган маълумотларга кўра, компания айрим ҳолатларда бир хонадонни икки кишига сотган. Жабрланувчилар пулларнинг катта қисмини таъсисчининг қўлига нақд кўринишда топширган. Айни пайтда ушбу қурувчи 167 кишини алдаган.

{Yii::t(}

Ўтказиб юбориш 6s

Ўтказиб юбориш

14 май куни Жиноят ишлари бўйича Шайхонтоҳур туман судида “Real lion houses” таъсисчиси ва унинг вакилларига нисбатан суд иши бўлиб ўтди. Маълум бўлишича, 2020 йил ноябрда давлат рўйхатидан ўтказилган “Real lion houses” одамларга Учтепа туманида қурилаётган 8 қаватли объектни таклиф этган. Суд ишида маълум бўлишича, жабрланувчиларнинг аксарияти хонадонларга тўловнинг 70-80 фоизини 2020-2021 йилларда амалга оширган. Уларнинг орасида 100 фоиз тўлов қилганлар ҳам бор. Жабрланувчилар уй учун тўловларнинг катта қисмини таъсисчининг қўлига нақд кўринишида берган. Қурувчи фирма масъуллари битта хонадонни 2 кишига ҳам сотган.

“Мен 2021 йилда қурилиш бошланганини эшитиб, улар хизмат қилаётган идорага бориб гаплашганман. Кейин яшаб турган уйимни сотиб шу уйга 17 минг АҚШ доллари пул тикдим. Нақд тўлаганим учун менга озгина скидка қилиб берган. Энди қарангки, менинг уйим 2 нафар одамга сотилган экан”, – дейди жабрланувчи.

Унинг судда кўрсатма беришича, “Real lion houses” таъсисчиси 1 йилда уйни битирамиз деб ваъда берган.

“Шундан келиб чиққан ҳолда, мен қизимникига кўчиб ўтдим, 5 йил бўляптики, ҳануз қизимникида яшаб турибман. Бу уйни ҳар доим суриштирганимда, “опа, ўша ердаги шароитларни кўринг, бундан кейин қурилишга ўша ердаги маҳалла йўл қўймаяпти” деган фикрлар бўлди. Майли деб уларниям тушундим. Менинг боқувчим йўқ, 1-гуруҳ ногирониман. Кўзим шартнома тузган пайти кўрарди. Мана, бир йилдирки кўрмай қолдим”, – дейди Юлдузхон Мамазойитова.

Судланувчилар Мамазойитованинг сўзларини тасдиқлади. Шунингдек, улар хонадон 2 кишига берилганини Мамазойитова инвестор бўлиб кирган эди деб изоҳлаб, уй берилишини айтди.

Тергов органи компания таъсисчиси ва унинг вакилларига фирибгарлик ҳамда яна бир нечта моддалар бўйича айблов эълон қилган. Айрим жабрланувчиларнинг кўрсатмалари қуйидагича:

“2021 йил биринчилардан бўлиб, жойни кўриб 2 та 1 хонали уйга тўлов қилганман. Иккаласиниям банкка тўлаганман. Биттасини 100 фоиз, биттасини 70 фоиз тўлаганман. 5 йилдан бери сарсон бўлиб юрибмиз, қачон борсам 3 ойда битади, 4 ойда битади деб юради”.

“2021 йил 15 сентябрда шартнома қилинган, бош тўловга Инфинбанкдан 238 млн пул тўлаганман. Кейин 2 йил давомида 100 фоиз тўлаб бўлдим”.

“2021 йил 16 сентябрда шартнома қилганмиз, кейин 240 млнга 1 хонали квартира олганмиз. Шу пайти атрофи ўралган, котлован қазилмаган жойларга пуллар тўлаганмиз. Нақди 68 млн тўлаганмиз. Қолганини 24 ойга бўлиб, банк орқали тўлаганмиз. Жами 228 млн тўлаганман”.

“2021 йил 18 сентябр куни 43,8 квадратлик уйга шартнома қилинган. 16 500 АҚШ долларини сўмга конвертация қилиб, нақд қўлларига берганман. Менга маълумотнома беришган. Кейин қолган 57 млн 530 мингни бўлиб тўлашга рухсат беришган, шундан 21 млнини банкка тўлаганман, қолганини нақд тўлаганман”.

Судланувчилар юқоридаги барча ҳолатларда одамлардан пул маблағини олганларини билдирди.

Жабрланувчилардан бири Учтепадаги объектдан 9 та хонадон сотиб олган ва унга 2 млрд сўмга яқин пул маблағини тўлаган. Яна бир жабрланувчи эса унга сотилган хонадон бошқа кишига ҳам сотилганини, у эса хонадонда таъмирлаш ишларини бошлаганини айтди. Суд раиси Толибжон Обидов нақд олинган пуллар қаерга ишлатилганини сўради. Компания таъсисчиси бунга жавобан, ёлланма ишчиларга пул тўланганини айтди. Бундан ташқари, у ўз вақтида уй топширилмаганини, ТЖМ бошқа уйлар ичида жойлашгани, 1 кунда 5-6 соат ишлаганини важ қилиб кўрсатди. Унинг сўзларига кўра, 2022 йил декабрида битиши керак бўлган уй қурилиши аҳолининг эътирозлари сабаб секин кечган. Орадан бир йил ўтиб, яъни 2024 йилнинг сентябрида таъсисчи қамоққа олинган. Суд залида бир жабрланувчи сўз олиб, таъсисчига қамоққа олиш эҳтиёт чораси қўлланганидан кейин унинг қонуний вакили одамлардан катта пул олганини гапирди. Хусусан, бошқа бир жабрланувчи терговдан кейин таъсисчининг ўринбосарига 95 млн сўм пул берганини айтди. Жабрланувчилардан бирига кўра, компания Учтепадаги объектнинг ер майдонини ноқонуний ўзлаштирган: дастлаб у ерда мактаб қурилиши айтилган. ТЖМнинг 4-5 қавати кўтарилгандан сўнг уй сифатида қонунийлаштириб олинган. Судланувчининг адвокатига кўра, таъсисчининг Чилонзор ва Яккасарой туманларида ҳам объектлари бор, уларда Учтепадаги каби жабрланувчилар кўп эмас.

“23-кварталдаги иш бўйича суд тергови бошланган. Ундан кейин Чилонзор тумани Нурхон маҳалласидаги ТЖМ ва Яккасаройдаги объект бўйича жабрланувчиларни сўроқ қиламиз”, - дейди адвокат Азамат Каримов.

Ушбу ҳолат юзасидан Қурилиш ва уй-жой коммунал хўжалиги соҳасида назорат қилиш инспекцияси изоҳ берди. Унга кўра, объектнинг лойиҳаси аслида хусусий мактаб биноси учун чиққан. Амалда кўп қаватли уй қуриб юборилган. Бу жараёнга қадар бир неча маротаба қурилиш масъулларига ёзма кўрсатмалар ҳамда тақдимномалар чиқарилган шунга қарамасдан қурилиш ишлари давом этган. Сўнгра, инспекция мазкур ҳолат бўйича судга даво аризалари киритган ва у қаноатлантирилган. Фуқаролар билан “Real lion houses” номи остида шартнома қилинган бўлса-да, унинг номи “New world star”га ўзгарган.

Тошкент туманлараро иқтисодий судининг 2024 йил 11 мартдаги ҳал қилув қарорида ҳам “New world star” МЧЖга тегишли хусусий мактаб биноси сифатида рўйхатга олинган, лекин ўзбошимчалик билан қурилган кўп қаватли турар жой мажмуасини демонтаж қилиш мажбурияти юклатилган. Аммо қарор ижроси таъминланмаган.

Суд 21 майга қадар танаффус эълон қилди.