Доналд Трамп Саудия Арабистонига келди

АҚШ президенти Доналд Трамп Саудия Арабистони пойтахти Ар-Риёдда қиролликнинг амалдаги раҳбари, валиаҳд шаҳзода Муҳаммад ибн Салмон билан учрашди. Яқин кунларда у Яқин Шарқнинг яна икки давлати – Қатар ва БААга ташриф буюришни режалаштирмоқда. Бу унинг янги президентлик муддати бошланганидан бери биринчи расмий хорижий ташрифидир.

Трамп ва бин Салмоннинг биринчи учрашувидан олинган суратларда улар Ар-Риёддаги Қирол Холид номидаги аэропортда Саудия қироллик оиласи аъзоларининг портретлари ёнида бирга ўтиришган. Учрашувда АҚШ давлат котиби Марко Рубио ҳам иштирок этмоқда.

Доналд Трамп Ар-Риёдда бугун ва эртанги куннинг бир қисмини ўтказишни режалаштирмоқда. АҚШ президенти бин Салмон билан учрашувдан сўнг Citigroup, IBM, Qualcomm, Alphabet ва Franklin Templeton компаниялари раҳбарлари ҳам иштирок этадиган Саудия Арабистони-Америка инвестиция форумида қатнашмоқчи. Кейинроқ у Форс кўрфази мамлакатлари етакчилари саммитига ташриф буюради.

Чоршанба куни саммитдан сўнг АҚШ президенти Қатарга жўнаб кетиши кўзда тутилган. У жума куни Бирлашган Араб Амирликларига ташриф буюриб, Яқин Шарқ бўйлаб сафарини якунлайди.

Душанба куни Трамп 15 май, пайшанба куни Россия-Украина тинчлик музокаралари бўлиб ўтиши кутилаётган Истанбулга боришини ҳам истисно қилмаслигини айтди.

Бундай учрашув ташаббуси Россия томонидан билдирилди, бироқ Украина президенти Володимир Зеленский шахсан Туркияга боришини ва у ерда Россия президенти Владимир Путинни кутишини маълум қилди. Кремл Путиннинг иштирокини истисно этмаган, лекин ҳозирча бундай музокаралар бўлиб ўтадими ёки йўқми ва улар қандай форматда ўтказилиши мумкинлиги аниқ эмас.

Трамп билан бирга АҚШ президентининг Яқин Шарқ бўйича махсус вакили Стив Уиткофф ва мудофаа вазири Пит Ҳегсет ҳам Яқин Шарққа йўл олди.

BBC мухбирлари хабар беришича, Трампнинг Яқин Шарққа сафаридан асосий мақсад — АҚШга қўшимча сармояларни жалб қилишдир.

Бу Трампга ўз сайловчиларига унинг «Биринчи навбатда Америка» мафкураси аниқ натижалар бераётганини кўрсатишга ёрдам беради.

АҚШ президентининг ташрифи Трамп дунёнинг барча мамлакатларига эълон қилган савдо уруши фонида бўлиб ўтмоқда. Оқ уй томонидан киритилган импорт божлари жаҳон савдосини сезиларли даражада издан чиқарди ва АҚШ иқтисодиётининг ўзига салбий таъсир кўрсатди.

Трампнинг Саудия Арабистони, Қатар ва БААга сафари унинг янги президентлик муддати бошланганидан бери биринчи расмий хорижий ташрифи бўлди.

Апрел ойи охирида Трамп Рим папаси Францискнинг дафн маросими муносабати билан Италияга келган, бироқ бу сафар олдиндан режалаштирилмаган эди.

Саудия Арабистони Трамп аввалги президентлик даврида ташриф буюрган биринчи давлат бўлганди.

Бунгача АҚШ президентлари биринчи навбатда Канада ёки Мексика каби асосий иттифоқчиларга ташриф буюриши анъана тусини олганди.