Украина музокарага тайёрлигини айтди, Россия ўйлаб кўришини маълум қилди

Украина президенти Владимир Зеленский ва Киевдаги «Кўнгиллилар коалицияси» йиғилишида иштирок этган Европа давлатлари етакчилари АҚШ президенти Доналд Трамп билан телефон орқали мулоқотда, агар 30 кунлик муддатга тўлиқ ўт очишни тўхтатиш бўйича келишувга эришилса, Украина томони Россия билан тўғридан-тўғри тинчлик музокараларини бошлашга тайёрлигини маълум қилди.

Axios хабарига кўра, Трамп билан суҳбат чоғида иттифоқчилар Владимир Путин ўт очишни тўхтатиш келишувини қўллаб-қувватлашдан бош тортса, Европа давлатлари Москвага қарши янги иқтисодий санкциялар пакетини жорий қилишини таъкидлаган.

Манбалардан бирининг айтишича, Доналд Трамп Украина ўт очишни тўхтатиш таклифини қабул қилганидан ва Кремль билан тўғридан-тўғри музокаралар олиб боришга тайёрлигини билдирганидан «хурсанд».

Иккинчи манба Америка президенти унинг ташаббусини Киев ва Европа пойтахтлари қўллаб-қувватлаганидан мамнунлигини тасдиқлади. «Биз ҳозир Россиядан жавоб кутмоқдамиз», деди нашри манбаси.

Ўз навбатида Россия президенти матбуот котиби Дмитрий Песков бу таклифга изоҳ берди.

«Биз бу ҳақда ўйлаб кўришимиз керак. Бу янги йўналиш. Бизнинг ўз позициямиз бор. Биз Европанинг бизга қаршилик қилаётганини кўряпмиз. Европа бизга очиқчасига қарши турибди, биз буни ҳис қиляпмиз, биламиз ва биз бунга ўрганиб қолганмиз. Россия тарихан босимга ён бермаган», деди Песков.