Трамп: Ғазода Ҳамас гаровга олган яна уч киши ҳалок бўлди

АҚШ президенти Доналд Трамп 6 май, сешанба куни Фаластиннинг Ҳамас гуруҳи томонидан Ғазо секторида гаровга олинган яна уч киши ҳалок бўлганини маълум қилди. Оқ уйда бўлиб ўтган тадбирда сўзлаган Трамп исроиллик гаровга олинганлар билан яқинда бўлиб ўтган учрашувда ташкилот асирлигида 24 киши тирик қолгани маълум қилинганини эслатди. «Бугунги кунда уларнинг сони 21 нафар, уч нафари ҳалок бўлди», деди Америка президенти.

«Биз имкон қадар кўпроқ гаровга олинганларни қутқариш учун қўлимиздан келганини қилмоқчимиз», — дея қўшимча қилди Доналд Трамп ва вазиятни «даҳшатли» деб атади. Исроил армиясининг 2023 йил 7 октябрдаги ўғирланганлар ҳақидаги сўнгги ҳисоботига кўра, улардан 58 нафари ҳали ҳам Ғазо секторида ҳамасчилар қўлида. 34 нафари вафот этгани тахмин қилинмоқда.

13-16 май кунлари Доналд Трамп Саудия Арабистони, Қатар ва Бирлашган Араб Амирликларига ташриф буюришни режалаштирмоқда. Шунингдек, у 6 май куни ташриф олдидан «жуда ва жуда муҳим эълон» беришини айтди, бироқ тафсилотларни келтирмади.