Европа Иттифоқи Путинга Украинага ҳарбий ёрдамни икки баравар ошириш билан таҳдид қилди

АҚШ президенти Доналд Трамп Владимир Путинни урушни тезда тугатишга кўндира олмаса, Европа Иттифоқи давлатлари Украинага ҳарбий ёрдамни сезиларли даражада ошириши мумкин, деди Европа Иттифоқи мудофаа комиссари Андрюс Кубилюс. Унинг сўзларига кўра, ЕИ ва АҚШ ҳозиргача Киевга йилига 40 миллиард еврога яқин ҳарбий ёрдам кўрсатган, бироқ бу маблағларни тўғридан тўғри украиналик ишлаб чиқарувчилардан арзонроқ қурол сотиб олишга йўналтириш орқали самаралироқ фойдаланиш мумкин. «Бу худди шу 40 миллиард евро эвазига Украина оладиган қуроллар миқдорини амалда икки баробарга оширади. Бизнинг қўллаб-қувватлашимизнинг ҳақиқий қиймати 80 миллиард еврогача кўтарилади», деб ёзди Кубилюс 4 май, якшанба куни Х ижтимоий тармоғида.

Европа комиссарининг эслатишича, Европа Иттифоқи мамлакатларида Украинага ёрдам беришнинг янги воситаси бор — улар Киев учун ҳарбий харидларни молиялаштиришда мудофаа кредитларидан фойдаланишлари мумкин. «Тинчлик орқали куч» формуласи амалда айнан шундай ишлаши мумкин. Кредитлар — Украина учун куч!» — дея таъкидлади Кубилюс.

Европа Иттифоқининг жорий йилда қабул қилинган кенг қамровли қайта қуролланиш режаси доирасида Еврокомиссия қуролларни биргаликда харид қилиш ва ишлаб чиқаришни тезлаштириш учун 150 миллиард евро миқдорида кредит ажратади. Янги молиявий имкониятлар Европа Иттифоқи мамлакатларига Украинада қурол ишлаб чиқаришга сармоя киритиш ёки Украина ҳарбий-саноат мажмуасини Европа билан интеграциялашувини таъминлаш учун маҳаллий компаниялар орқали ҳамкорлик қилиш имконини беради, дея тушунтирди Европа комиссияси раиси Урсула фон дер Ляйен.