Рамзон Қодиров ўзини Чеченистон раҳбари лавозимидан озод этишни сўраганини айтди

Россиянинг Чеченистон Республикаси раҳбари Рамзон Қодиров ўз лавозимидан озод этилишини сўраганини маълум қилди. Бу ҳақда «Чечня сегодня» хабар берди.

Журналистлар республика раҳбаридан унинг истеъфога чиқиши ҳақидаги миш-мишлар ҳақида сўрашди.

«Мен ҳам бу миш-мишларни эшитдим. Улар ҳар хил нарсаларни ёзадилар. Аксинча, мен лавозимимдан бўшатишни ўзим сўрадим. Бошқа раҳбарда ўз ташаббуси, ўз қарашлари бўлади. Умид қиламанки, илтимосим қўллаб-қувватланади», деди у.

Чеченистон раҳбари бу сўзларни жиддий айтганми ёки ҳазиллашганми, маълум эмас.

Рамзон Қодиров 2007 йилнинг 5 апрелида республика раҳбари бўлди. У ўз лавозимини Россиядаги бошқа ҳудудлар раҳбарларидан кўра узоқ вақт давомида эгаллаб келмоқда. Чеченистон раҳбарининг сўнгги сайлови 2021 йил сентябрида бўлиб ўтган. Марказий сайлов комиссияси маълумотларига кўра, у 99,7 фоиз овоз олган. Қодировнинг президентлик муддати 2026 йилда тугайди.