OpenAI тижорий компанияга айланиш режасидан воз кечди

Американинг OpenAI компанияси нотижорат ташкилот бошқаруви остида қолишини маълум қилди.

Компания раҳбари Сэм Алтманнинг ходимларга йўллаган хатида қайд этилишича, OpenAI нотижорий масъулияти чекланган жамиятдан жамоатчилик манфаатларини таъминлаш бўйича корпорацияга айлантирилади.

«Фуқаролик жамияти етакчиларининг фикрини тинглаб, Калифорния ва Делавер штатлари бош прокурорлари идоралари билан музокаралар олиб боргач, нотижорий ташкилот устидан назоратни сақлаб қолиш қарорига келдик. Microsoft ва янги тайинланган нотижорий ташкилотлар комиссияси аъзолари ҳамда юқоридаги идоралар билан кейинги музокаралар давомида ушбу режанинг тафсилотларини ишлаб чиқишни интиқлик билан кутмоқдамиз», — дейилади Сэм Алтман хатида.

Олдинроқ компания ходимларни сақлаб қолиш ва янги инвесторларни жалб қилиш учун ўз тузилмасини тижорий бошқарувга ўзгартиришни режалаштираётганини эълон қилганди.

Маълумот учун, OpenAI 2015 йилда ташкил этилган бўлиб, сунъий интеллект технологиялари соҳасида дунёдаги етакчи компаниялардан биридир. У вақтда компаниянинг икки раиси бор эди — Илон Маск ва Сэм Алтман. Компания «сунъий интеллект соҳасида нотижорий ва инсониятга фойда келтирадиган тадқиқотлар билан шуғулланиши» белгиланган. Аммо 2018 йилда Маск тижорий фаолиятга ўтганидан норози бўлиб, компанияни тарк этган.

Аввалроқ ChatGPT чатботини тақдим этган OpenAI компанияси Twitterʼга ўхшаш ўзининг ижтимоий тармоғини яратиш устида иш олиб бораётгани тўғрисида хабар берилганди.