АҚШда жисмоний шахслар буюртма қилган хорижий товарлар учун божсиз режим бекор қилинди

Кўплаб америкаликлар президент Трамп киритган кенг қамровли тарифларнинг жиддий таъсирини мана энди сеза бошлайди, дея хабар тарқатди CNN.

2 майдан бошлаб АҚШда жисмоний шахсларнинг ўз эҳтиёжлари учун хориждан товар буюртма қилиб, уни божсиз олиб кириш имтиёзи бекор қилинди.

Тўхтатилган “de minimis” (лотинчадан “аҳамиятсиз даражада кичик” маъносини беради) институти АҚШга кириб келаётган, қиймати 800 доллардан кам бўлган жўнатмаларни божсиз ўтказиб юборишни назарда тутарди. Бу тартиб майда-чуйда юкларга нисбатан бож ҳисоблаш ортиқча вақт олиши ва самарасиз бўлгани учун 1938 йилда жорий этилган ва шундан бери амал қилиб келаётганди.

Сон-саноқсиз америкаликлар бу имтиёздан фойдаланиб, Хитойнинг жуда паст нархларда товар етказиб берувчи Shein, Temu ва Aliexpress каби сайтлари орқали игна-ипдан тортиб, мебелларгача, кийим-кечакдан тортиб, турли гаджетларгача бўлган кўплаб товарларни харид қилиб келаётганди.

Энди эса бу товарлар ҳам, худди тижорий мақсаддаги товарлар қатори, Хитой маҳсулотлари учун ўрнатилган 145 фоизгача бўлган тарифларда божга тортилади.

UPS, FedEx, DHL ва АҚШ почта хизмати бу ўзгаришларга тайёрлигини билдирган. АҚШ божхона идораси ҳам техник жиҳатдан тайёргарлик кўриб қўйганини маълум қилди. Лекин оддий америкалик харидорлар бу қимматлашишга тайёрми – бу алоҳида масала, деб ёзади CNN.

BBC хабарига кўра, Temu компанияси платформа орқали буюртма қилинган товарларни тўғридан тўғри америкалик харидорларга сотишни тўхтатишини билдирган. Бу – “de minimis” тартибининг бекор қилингани билан боғлиқ бўлиб, маркетплейсда сотилаётган товарлар энди америкалик буюртмачиларга маҳаллий савдогарлар орқали етказиб берилади. Хитой компанияси бунинг учун АҚШ фирмаларини ҳамкорликка чорлаган.

АҚШ федерал ҳукумати – нафақат жорий президент Доналд Трамп, балки Оқ уйнинг собиқ раҳбари Жо Байден ҳам “de minimis” тартибини қоралаб келган. Уларга кўра, бу имтиёз АҚШ ишлаб чиқарувчиларининг зарари кўришига ва хориждан товарларнинг катта миқдорда, лекин кичик-кичик партияларда олиб кирилишига сабаб бўлмоқда. Бундан ташқари, ҳукумат божхонадаги бу енгиллик орқали ноқонуний товарлар, хусусан гиёҳванд моддалар ҳам кириб келаётганини даъво қилади.

“Америка ҳаракати форуми” ташкилоти ҳисоб-китобларига кўра, ўтган йилги буюртмалар ҳажмидан келиб чиқилса, божсиз тартибнинг бекор қилиниши америкалик истеъмолчиларнинг умумий йиллик харажатларини 8 млрд доллардан 30 млрд долларгача оширади.