Трамп ва Зеленскийнинг Ватикандаги 15 дақиқалик суҳбати тафсилотлари маълум қилинди

Украина президенти Владимир Зеленский Ватиканда Доналд Трамп билан 15 дақиқалик суҳбатдан фойдаланиб, Киев ўт очишни сўзсиз тўхтатишга тайёр эканлигига ва Оқ уй раҳбари тинчликка эришиш йўлидаги саъй-ҳаракатлардан воз кечмаслиги кераклигига уни ишонтирган, деб ёзди The Economist украиналик манбаларга таяниб. Шунингдек, Зеленский Трамп билан суҳбатда Владимир Путин ўт очишни тўхтатишга рози эмаслигини таъкидлаган.

Нашрнинг қайд этишича, Трамп «уни тушунган». Кейинроқ Оқ уй раҳбари Путин можарога барҳам беришга интилмаслигини тан олди.

«Балки у [урушни] тўхтатмоқчи эмасдир, балки мени шунчаки алдаётгандир ва биз у билан бошқача гаплашишимиз керакдир, «банк» ёки «иккинчи даражали санкциялар» орқали? Жуда кўп одамлар ўлмоқда!!!», деб ёзди у Truth ижтимоий тармоғида.

Путиннинг Ғалаба кунида уч кунлик ўт очишни тўхтатиш ҳақидаги сўнгги қароридан Оқ уй таассуротда эмас, деди АҚШ расмийси нашрга. «Жараён бошида Трамп Зеленскийдан жуда ҳафсаласи пир бўлган эди. Энди бу [хафагарчилик] Путинга ўтди», деб таъкидлади у.

Зеленский Трамп билан Ватикандаги учрашувни «жуда рамзий» деб атади ва бу «тарихий» бўлиши мумкинлигини таъкидлади. «Биз барча масалалар бўйича натижаларга умид қиламиз (...) тўлиқ ва сўзсиз сулҳ», деди у.

«Менимча, учрашув яхши ўтди», деди Трампнинг ўзи. Унинг таъкидлашича, «Зеленский энди хотиржамроқ» ва «ўз мамлакати учун яхшироқ иш қилишга уринмоқда».

Суҳбат мазмунига келсак, Трамп Зеленский ундан қўшимча қурол сўраганини айтди. «Аммо у бу ҳақда уч йилдан бери гапирмоқда. Кўрамиз, воқеалар қандай кечишини», деб қўшимча қилди АҚШ президенти.