АҚШда Wikipedia тарихга оид маълумотларни манипуляция қилишда айбланди

Колумбия округи федерал прокурори Эдвард Мартин Wikipedia онлайн энциклопедиясини пропаганда ва АҚШ тарихига оид маълумотларни манипуляция қилишда айблади.

Мартин томонидан Wikimedia фондига йўлланган хатда айтилишича, платформадаги ахборот манипуляцияси муҳим тарихий воқеалар ҳамда амалдаги ва собиқ Америка етакчиларининг биографик маълумотларини қайта ёзишни, шунингдек, «АҚШ манфаатлари ва миллий хавфсизлигига тааллуқли бошқа масалаларни» ўз ичига олади.

Прокурорнинг сўзларига кўра, бундай ёндашув ташкилотнинг таълим миссиясига зиддир. Мартин Wikimedia’га фонднинг маълумотларни жойлаштиришда шаффофлик, жавобгарлик ва хавфсизлик бўйича амалиётига оид 10 га яқин савол юборган. Прокурор май ойининг ўрталаригача уларга жавоб олишни хоҳламоқда.

Прокурор Мартин ташкилотнинг хатти-ҳаракатлари унинг солиқдан озод қилинганлик мақомига зид бўлиши мумкинлигини аниқламоқда.

Wikipedia ўзини ўзи бошқарувчи модел асосида фаолият юритади, исталган одам унинг саҳифаларига ўзгартириш киритиши мумкин — бунда фақат олдин эълон қилинган ишончли манбаларга ҳавола берилади. Шу боис ҳеч ким Wikipedia’га олдин эълон қилинмаган, янги маълумотни жойлаштира олмайди. Сайтда маълумотларни текшириб, таҳрирлаш билан волонтёрлар шуғулланади.