ФХХ россиялик генерални портлатишда гумонланган шахс қўлга олинганини маълум қилди

У сўроқ давомида портлашни Украина махсус хизматлари топшириғига кўра амалга оширганини тан олган.

Фото: Видеодан кадр

Федерал хавфсизлик хизмати (ФХХ) Россия Қуролли кучлари Бош штаби оператив бошқармаси бошлиғи ўринбосари генерал-лейтенант Ярослав Москаликни ўлдиришда гумонланган шахсни қўлга олди.

Гап 42 ёшли Игнат Кузин ҳақида кетмоқда, ФХХ уни «Украина махсус хизматлари агенти» деб атамоқда. Версияларга кўра, у Volkswagen Golf машинасига «Украина махсус хизматларига тегишли Москва областидаги махфий жойдан олинган қўлбола портловчи қурилмани ўрнатган». 25 апрел куни Москалик подъезддан чиққанида Украина махсус хизматлари уни масофадан туртиб ҳаракатга келтирган. Генерал-лейтенант ҳодиса жойида ҳалок бўлган.

ФХХнинг таъкидлашича, Кузин Украинада яшаш гувоҳномасига эга бўлган. У теракт ва ноқонуний портловчи моддалар сақлашга оид жиноят иши доирасида сўроқ қилиниш учун Тергов қўмитасига олиб борилган. Кузин умрбод қамоқ жазосига ҳукм қилиниши мумкин. ТАСС манбаларининг маълум қилишича, гумонланувчи Истанбулда, «Москвадан учиб келганида» ушланган. Унинг Россияга қайтарилиши қандай ташкил этилганига аниқлик киритилмаган.

Шунингдек, ФХХ Кузиннинг сўроқ қилиниш жараёнидан кадрлар эълон қилган. Видеода у Киев областида 2023 йил апрел ойида Украина махсус хизматлари томонидан оғдириб олинганини тан олган ва «Вадим исмли куратор»нинг топшириғи билан Москвага келганини айтган. Кузиннинг таъкидлашича, шундан сўнг унга махфий жой координалари берилган ва гумонланувчи у ердан кузатув камераси ҳамда автомобилга ўрнатиш учун бомбани олган. Машинани эса унинг сўзларига кўра, айнан куратор — Украина ҳудудидан туриб портлатган.

«Вот Так» нашрининг аниқлашича, Кузин Россияда туғилган, аммо узоқ вақт Украинада яшаган. Mash’нинг ёзишича, 2014 йилдан кейин Кузин мунтазам равишда Россияга ишлаш учун келган, Мариуполдаги «Азовстал» заводида ишлаган.

Москаликнинг ўлимига сабаб бўлган Volkswagen Golf 25 апрел куни эрталаб Москва яқинидаги Балашиха шаҳрида портлаб кетганди. Генерал Россия армиясида қарийб 40 йилдан бери хизмат қилиб келаётганди. 2015 йилда у «норманд формати» доирасида Украина билан музокараларда иштирок этган, шунингдек, Россиянинг Суриядаги ҳарбий операцияларига боғлиқ мавзуларда спикер бўлган.

#Россия #ФХХ #Ярослав Москалик