АҚШ Ямандаги нефт терминалига зарба берди: 60 га яқин киши ҳалок бўлган

«Америка кучлари Эрон томонидан қўллаб-қувватланаётган террорчи ҳусийчилар учун ёнилғи манбаси бўлган нишонни йўқ қилиш ва уларни 10 йилдан ортиқ вақт давомида бутун минтақадаги ҳусийчиларнинг террорчилик ҳаракатларини молиялаштирган ноқонуний даромадларидан маҳрум қилишга ҳаракат қилди», — дейилади АҚШ қуролли кучлари Марказий қўмондонлиги (CENTCOM) баёнотида.

Америкалик ҳарбийлар маълумотига кўра, йил бошида Вашингтон исёнчиларни хорижий террорчилик ташкилоти деб эълон қилганига қарамай, бу ерга порт орқали ёнилғи етказиб берилиши давом этган.

Яманнинг шимоли-ғарбий қисмини бошқараётган ҳусийчилар ҳукумати терминал фуқаролик объекти экани ва унга қилинган ҳужум «тўлақонли ҳарбий жиноят» ҳисобланишини маълум қилди.

«Рас-Иса»га зарба берилганидан бир неча соат ўтгач, Исроил ҳарбийлари Ямандан учирилган ракетани тўхтатиб қолганини маълум қилди.

Исроилнинг бир қанча ҳудудларида сиреналар янгради, аммо қурбонлар ёки вайронагарчиликлар ҳақида хабар берилмади.

Ҳусийчилар томонидан бошқариладиган «Ал-Масира» телеканали хабарига кўра, пайшанба куни кечқурун Ҳудайда шаҳридан тахминан 60 км узоқликда жойлашган «Рас-Иса»га 14 бор ҳаво ҳужуми уюштирилган.

Телеканалнинг маҳаллий соғлиқни сақлаш идораларига таяниб хабар беришича, ҳалок бўлганларнинг аксарияти ишчилар бўлган. Шунингдек, маълум қилинишича, 5 нафар фелдшер воқеа жойига етиб келганида АҚШнинг такрорий зарбалари оқибатида ҳалок бўлган.

Қурбонлар ҳақидаги хабарларни текширишнинг имкони йўқ, бироқ «Ал-Масира» телеканали томонидан намойиш этилган кадрларда ёнаётган цистерналар ёнида камида 10 кишининг куйган жасадларини кўриш мумкин. Шунингдек, оғир куйиш жароҳатлари билан шифохонага олиб борилганлар акс этган кадрлар ҳам бор.

«Биз «Рас-Иса» нефт портига зарба бериш тўлақонли ҳарбий жиноят эканлигини тасдиқлаймиз, чунки порт ҳарбий эмас, балки фуқаролик объекти ҳисобланади», – дейилади ҳусийчилар ҳукумати баёнотида. – Биз Қизил денгиздаги кескинлашув оқибатлари учун барча масъулиятни АҚШ маъмуриятига юклаймиз».

Эрон Ташқи ишлар вазирлиги зарбаларни «варварларча ҳужум» сифатида қатъий қоралашини маълум қилди.

Пайшанба куни ҳусийчилар етакчиси Абдул Малик ал-Ҳусий март ойи ўрталаридан бери гуруҳ кучлари 170 га яқин ракета ва дронлардан фойдаланган ҳолда 80 га яқин операция ўтказганини, жумладан, Американинг USS Harry S Truman авиаташувчисига 30, Исроилга эса 26 бор ҳужум уюштирганини айтганди.

Яман фуқаролар уруши туфайли вайрон бўлган. Мамлакатдаги уруш 10 йил олдин ҳусийчилар мамлакатнинг шимоли-ғарбий қисмини назоратга олиб, халқаро тан олинган ҳукуматдан ҳудудларни тортиб олгандан сўнг янги босқичга кўтарилди, ўшанда Саудия Арабистони бошчилигидаги араб коалицияси (АҚШ ҳам уни қўллаб-қувватлайди) олдинги ҳукуматни қайтариш учун можарога аралашди.

Ҳарбий ҳаракатлар оқибатида 150 мингдан ортиқ одам ҳалок бўлган, гуманитар фалокатга юзага келган: 4,8 миллион киши ўз уйларини тарк этишга мажбур бўлган, 19,5 миллион киши – аҳолининг ярми – у ёки бу турдаги ёрдамга муҳтож.

Исроилнинг Ғазодаги операцияси бошланганидан сўнг, 2023 йил ноябр ойидан бошлаб, ҳусийчилар Қизил денгиз ва Адан кўрфазидаги савдо кемаларини ўққа тута бошлади. Улар иккита савдо кемасини чўктириб, яна бирини қўлга олишди ва экипажнинг тўрт аъзосини ўлдиришди.

Ҳусийчилар Ғазодаги Исроил ва ҲАМАС ўртасидаги урушда фаластинликларни қўллаб-қувватлаш учун ҳаракат қилаётганини ва уларнинг нишони фақат Исроил, АҚШ ёки Буюк Британия билан боғлиқ кемалар эканини айтган. Шу билан бирга, ушбу мамлакатларга ҳеч қандай алоқаси бўлмаган кемалар бир неча бор ўққа тутилди.

Ҳусийчилар Исроилни бир неча бор ракеталар билан ўққа тутган, лекин бирор марта жиддий муваффақиятга эриша олмаган.

На Ғарб ҳарбий кемаларининг Қизил денгизда кемалар қатновини ҳимоя қилиш учун жойлаштирилиши, на АҚШнинг собиқ президент Жо Байден буйруғи билан ҳусийчилар назорати остидаги ҳудудларда жойлашган ҳарбий объектларга зарбалари берилиши вазиятни ўзгартира олди.

Январ ойида лавозимга киришганидан сўнг, Трамп ҳусийчиларни яна «хорижий террорчилик ташкилотлари» рўйхатига киритди, Байден маъмурияти эса мамлакатдаги гуманитар инқирозни юмшатишга уриниб, гуруҳни рўйхатдан чиқарганди.

Март ойида Трамп ҳусийчилар назоратидаги ҳудудларга кенг кўламли зарбалар беришни буюрди ва улар «бутунлай йўқ қилиниши» билан таҳдид қилди.