Лавров Путиннинг янги «амбицияли» режаларини маълум қилди

Кремл Украина билан кифояланмаслиги, бошқа ҳудудларга ҳам кўз тиккани ҳақида очиқ ишора қилмоқда, деб ёзмоқда Америкадаги Урушни ўрганиш институти таҳлилчилари.

Фото: RTVi

Россия ташқи ишлар вазири Сергей Лавров сўзларига кўра, Москва Украина билан қандайдир якунланган келишувга эришмаган, шунингдек, Путин яна бир қатор минтақаларга — Шарқий Европа, Марказий Осиё ва Жанубий Кавказга қизиқиш билдирмоқда, дейишмоқда таҳлилчилар.

Лавров Донбасс ва «Новороссия» ҳудудларини Украинага тегишли деб ҳисобламаслигини яна бир бор таъкидлади. Унга кўра, Одесса россияликлар томонидан қурилган ва Киев ҳукумати бу шаҳар аҳолиси манфаатларини ифода этолмайди. Владимир Путин эса 2023 йилда Қрим, Одесса ва бутун Қора денгиз минтақасини Украина билан боғлаш мумкин эмаслигини айтган эди.

Лавровнинг сўзларича, Россия учун хавфли нарса — «фашистлар» тарихан Россия империяси ёки СССРга тегишли бўлган ерларни эгаллаши. Унинг бу баёноти Россиянинг Болтиқбўйи давлатлари, Молдова ва СССР таркибида бўлган бошқа давлатларга қарата даъволарини англатади.

Шунингдек, Россия ташқи разведка хизмати раҳбари Сергей Наришкин ҳам Финландия ва НАТО мамлакатларига таҳдид қилган. Унинг баёнотларида Путиннинг 2022 йилги Украинага бостириб киришидан олдинги риторикаси қайта акс этмоқда. У, хусусан, Болтиқбўйи мамлакатлари ва Полша биринчи бўлиб «азият чекишини» айтиб ўтган.

Наришкин Трампнинг Европа мамлакатларини ўз мудофаа қобилиятини мустақил равишда кучайтиришга чақирувини ҳам танқид қилиб, бундай ҳаракатлар Россияни ўзига хос равишда «ҳимоя» чораларини кўришга мажбур қилаётганини айтди. Кремл вакиллари 2023–2024 йилларда НАТОга нисбатан бир неча бор очиқ таҳдид қилган.

#Сергей Лавров #Владимир Путин