Британия Ҳуқуқшунослик университети Ўзбекистонда ўз кампусини ташкил этиши мумкин

Ўзбекистон элчиси Равшан Усмонов Британиянинг Ҳуқуқшунослик университети (University of Law) проректори, профессор Питер Крисп билан музокара ўтказди.

Фото: "Дунё" АА

Учрашувда мазкур университет ва Ўзбекистон олий таълим ва илмий тадқиқотлар муассасалари ўртасида ҳамкорлик алоқаларини йўлга қўйиш, жумладан, икки томонлама диплом бериш дастурини амалга ошириш, Ҳуқуқшунослик университетининг таълим ва ўқув дастурларини жорий этиш масалалари муҳокама қилинди.

Проректор Питер Крисп Ўзбекистонга бир неча бор бўлганини, қолаверса минтақа билан яқиндан таниш эканини маълум қилди. У Ўзбекистонда Британия таълим стандартларини жорий этишдан манфаатдорлигини таъкидлади.

Мулоқот давомида шу йил 29-30 май кунлари Тошкентда ўтказилиши режалаштирилган IV International Legal Forum - Tashkent Law Spring тадбири тўғрисида маълумотлар берилди.

Учрашув якунида мазкур йўналишда ҳамкорликларни жадаллаштиришга келишиб олинди.

University of Law 1903 йилда ҳуқуқшунослик институти сифатида ташкил этилган. 2012 йилда эса университет мақоми берилди. Ҳозирги кунда ушбу таълим муассасасида 16 минг нафарга яқин талабалар таҳсил олмоқда. Муассасада салкам икки минг профессор-ўқитувчи ва мутахассислар фаолият юритади. Унда ҳуқуқшунослик йўналишлари билан бирга, бизнес бошқаруви соҳаларида ҳам сабоқ берилади. Университетнинг Германия ва Ҳонгконгда ўз филиаллари бор.

#Британия #ҳуқуқшунослик