Байден Оқ уйни тарк этганидан кейин биринчи марта Трампни танқид қилди

АҚШ собиқ президенти Жо Байден лавозимидан кетганидан кейин биринчи марта нутқ сўзлади. Бу ҳақда BBC хабар берди.

У Чикагода ногиронлар ҳуқуқларига бағишланган анжуманда қатнашиб, ҳукуматни Ижтимоий таъминот тизимига «ҳалокатли зарба» берганликда айблади. Аввалроқ, миллиардер Илон Маск бу тизимни «тарихдаги энг катта молиявий пирамида» деб атаган эди.

«100 кундан камроқ вақт ичида бу янги маъмурият шунчалик кўп зарар ва бузғунчилик қилдики, бу жуда ҳайратланарли», деди Байден.

Собиқ президент ўз нутқида амалдаги давлат раҳбари номини бирор марта тилга олмади. У ижтимоий таъминотни «муқаддас бурч» деб атади ва инсонлар ҳаёти учун катта аҳамиятга эга эканлигини таъкидлади. Унинг сўзларига кўра, Америка халқи ҳеч қачон бунчалик пароканда бўлмаган ва фақат 30 фоизи ҳозирги вазиятдан мамнун. Аммо бу 30 фоизда «қалб йўқ».

Ижтимоий таъминот агентлиги пенсия, қарилик ва ногиронлик нафақаларини тўлайди. У тахминан 67 миллион америкаликни қўллаб-қувватлайди ва йилига тахминан 1,6 триллион доллар сарфлайди.

Илон Маскнинг Ҳукумат самарадорлиги департаменти (DOGE) февраль ойида агентлик ходимларини қисқартиришни бошлади. 7 мингга яқин одамни ишдан бўшатиш режалаштирилган.

15 апрель куни Доналд Трамп ноқонуний мигрантлар ва «бошқа номақбул» шахсларга ижтимоий суғурта тўловларини олишни тақиқловчи фармонни имзолади. Бироқ, у сохта тўловлар ва ноқонуний мигрантларга тўловларни бартараф этиш ниятида бўлса-да, нафақаларни бутунлай қисқартирмоқчи эмаслигини айтди.

Байденнинг Чикагодаги нутқи олдидан Трампнинг матбуот котиби Кэролин Левитт журналистларга президент «қонунга бўйсунувчи америкалик солиқ тўловчилар ва нафақахўрлар» учун имтиёзлар сақланиб қолишига «мутлақо амин» эканини айтди.

«У ҳар доим ушбу дастурни ҳимоя қилади», деб қўшимча қилди у.

Ҳозир Трампнинг одамлари томонидан бошқариладиган Ижтимоий таъминот агентлиги Байденни ёлғончиликда айблади. Агентлик хабарида айтилишича, Трамп кекса фуқароларнинг даромадларини ошириш учун имтиёзларга солиқ солишни бекор қилмоқчи. 2015-2022 йиллардаги текширувда 72 миллиард долларга яқин нотўғри тўловлар аниқланган ва ўтган ҳисобот йилида 2 миллиондан ортиқ ноқонуний мигрантга ижтимоий суғурта рақамлари берилган (бу рақамлар иш учун рухсат олган ҳар бир мигрантга берилиши керак).

Агентлик, шунингдек, технологик жамоанинг ярми ишдан бўшатилганини рад этди ва телефон хизматларини янгилаш учун 16,5 миллион доллар сармоя киритилганини маълум қилди.