Зеленский парламентга ҳарбий ҳолат ва умумий сафарбарликни яна уч ойга узайтириш тўғрисидаги қонун лойиҳаларини киритди

Қонун лойиҳалари билан ҳарбий ҳолат ва умумий сафарбарликни яна камида 90 кунга — 2025 йил 6 августга қадар узайтириш режалаштирилмоқда.

Фото: РБК-Украина

Украина президенти Володимир Зеленский Олий Радага ҳарбий ҳолат ва умумий сафарбарлик муддатини узайтириш тўғрисидаги қонун лойиҳаларини тақдим этди, деб ёзмоқда «РБК-Украина».

Қонун лойиҳалари билан ҳарбий ҳолат ва умумий сафарбарликни яна камида 90 кунга — 2025 йил 6 августга қадар узайтириш режалаштирилган.

Украинада ҳарбий ҳолат ва умумий сафарбарлик 2022 йил февралда, Россия томонидан кенг кўламли уруш бошланганидан кейин эълон қилинган эди. Шундан бери унинг муддати мунтазам равишда узайтириб келинмоқда.

Бундан олдин Олий Рада январ ойида ҳарбий ҳолат ва умумий сафарбарлик муддатини 2025 йил 9 майга қадар узайтиришга озов берганди.

Украинада ҳарбий ҳолат даврида сайловлар ўтказиш мумкин эмас. РФ ҳукумати бир неча Украина президентининг легитимлигини шубҳа остига олиб, Зеленскийнинг ваколатлари муддати тугаганини таъкидлаган.

Украинада президентлик сайловларини ўтказиш 2024 йил март ойига режалаштирилганди. Парламент сайловлари 2023 йил октябрда бўлиб ўтиши керак эди. Украинада ҳарбий ҳолат туфайли сайловлар ўтказилмаган.

2019 йилги сайловлар аввалида Зеленский фақат бир муддатга президентлик лавозимида қолишини ва иккинчи муддатга сайланиш ниятида эмаслигини маълум қилганди. 2023 йилда у келгуси йилда, уруш вақтида сайловлар ўтказиладиган бўлса, президентликка яна номзодини кўрсатиш режасини айтган. Лекс Фридманга берган интервюси давомида эса Зеленский Украинада сайловлар ҳарбий ҳолат бекор қилиниши билан ўтказилишини маълум қилган.

#Украина #ҳарбий ҳолат #Володимир Зеленский