Хитой савдо уруши доирасида Boeing самолётларини сотиб олишни тўхтатди

Хитой ҳукумати авиакомпаниялардан АҚШ билан савдо уруши доирасида Boeing самолётларини сотиб олишни тўхтатишни талаб қилди, деб хабар берди Bloomberg. Бундан ташқари, америкалик ишлаб чиқарувчилардан асбоб-ускуналар ва эҳтиёт қисмларни сотиб олишни ҳам тўхтатиш буюрилди.

Аввалроқ, АҚШ томонидан Хитой товарларига 145 фоизлик бож жорий қилинган эди. Бунга жавобан Хитой томонидан АҚШ товарларига 125 фоизлик тарифлар эълон қилинди.

Нашр суҳбатдошлари таъкидлаганидек, божларнинг ўзи Америкада ишлаб чиқарилган самолётлар ва эҳтиёт қисмлар нархини икки бараварга оширади, шунинг учун «Хитой авиакомпаниялари томонидан Boeing самолётларини қабул қилиш мантиққа тўғри келмайди».

Ҳукумат Boeing самолётларини ижарага олган ва харажатларнинг ортиб боришига дуч келган авиакомпанияларни қўллаб-қувватлаш йўлларини кўриб чиқмоқда.

Aviation Flights Group маълумотларига кўра, Хитой авиакомпаниялари, жумладан, China Southern Airlines, Air China ва Xiamen Airlines парки ўнга яқин Boeing 737 Мах самолётлари билан тўлдирилиши керак эди. Нашр манбаларига кўра, Пекин уларнинг айримларини ҳали ҳам қабул қилиши мумкин, чунки ҳужжатлар Хитой божлари кучга кирган 12 апрелдан олдин тузилган.