Reuters: ЕИ компаниялари Россия гази импортини оширмоқчи

АҚШ ва ЕИ ўртасидаги савдо уруши авж олган бир пайтда Европанинг йирик энергетика компаниялари Россия газини харид қилишни сезиларли даражада оширмоқчи, деб хабар берди Reuters 14 апрел, душанба куни.

Франциянинг Engie компанияси раҳбари Диде Оллонинг сўзларига кўра, Россия Федерациясидан етказиб бериш Украинада тўлиқ миқёсли уруш бошланишидан олдин мавжуд бўлган 40 фоиз улушга нисбатан, Европа Иттифоқи эҳтиёжларининг тахминан 20-25 фоизини қоплаши мумкин. «Агар Украинага оқилона тинчлик келса», у ҳолда Россиядан Европага йилига 60-70 миллиард кубометр етказиб бериш ҳажмини муҳокама қилиш мумкин бўлади, деди у Reuters агентлигига.

Франциянинг яна бир компанияси TotalEnergies раҳбари Патрик Пуянне Европа таъминотни диверсификация қилиши кераклигини айтди. «Бизга бир ёки иккита эмас, кўп йўналишлар керак», — дея унинг сўзларини келтиради агентлик. «Европа ҳеч қачон урушдан олдинги каби Россиядан 150 миллиард куб метр импорт қилишга қайтмайди... лекин мен 70 миллиард куб метр ҳақида гапирган бўлардим», дея қўшимча қилди Пуянне.

2022 йилда Европа Иттифоқи 2027 йилгача Россия газини импорт қилишни тўхтатиш мақсадини эълон қилди, бироқ уни амалга ошириш режасини чоп этишни икки марта кечиктирди, деб эслатади Reuters.