Жиззахда АЭС учун биринчи ишлаб чиқариш бинолари қурилиши бошланди

Жиззахда кам қувватли атом электр станцияси лойиҳаси учун биринчи ишлаб чиқариш бинолари қурилиши бошланди. Бу ҳақда “Ўзатом” агентлиги хабар берди.

Бугун, 15 апрел куни Жиззах туманида қурилиш-монтаж базасини қуриш ишлари бошланди.

Бу база энергоблоклар қурилиши давридаги муҳим инфратузилма объекти бўлиб, маъмурий бинолар, ишлаб чиқариш хоналари, омборлар ва йирик йиғма корхоналарини ўз ичига олади.

Қурилишга старт бериш жараёнида АЭС қурилиши дирекцияси директори Отабек Омонов ва Россиянинг “Атомстройэкспорт” компанияси вице президенти Павел Безруков иштирок этди.

Лойиҳага тайёргарлик ишлари 2024 йил ёзида бошланган бўлиб, июн ойида қурилиш бўйича биринчи штаб йиғилиши бўлиб ўтган, августда қурувчилар учун вахта яшаш шаҳарчаси қурилиши бошланган. Бу ерда АЭСдан ташқари, маданият, таълим ва тиббиёт объектлари қуриш ҳам кўзда тутилган.

Эслатиб ўтамиз, Ўзбекистон ва Россия ўртасида 2024 йил 27 майда имзоланган шартнома асосида, Жиззах туманида умумий қуввати 330 MW бўлган, ҳар бири 55 MW қувватга эга 6 та реактордан иборат кам қувватли АЭС қурилиши кўзда тутилган.

Станция асосини ҳозиргача музёрар кемаларда қўллаб келинган РИТМ-200 сув-сувли ядро реакторларининг қуруқликда ишлашга мослаштирилган РИТМ-200Н версияси ташкил этади. Аммо ҳозиргача бу технология ер устида ишлатилмаган.

Бош пудратчи – “Росатом”нинг инженерлик дивизиони бўлмиш “Атомстройэкспорт” АЖ. Қурилишга Ўзбекистон компаниялари, хусусан Saneg ҳам жалб этилиши мумкин. Лойиҳа қиймати 2 млрд доллардан ошмаслиги, харажатлар асосан ташқи қарзлар ҳисобига бўлиши маълум қилинган.

“Ўзатом” раҳбари Азим Аҳмадхўжаев ўтган ойдаги интервюсида АЭСда ишлаб чиқариладиган электр энергиясининг таннархи техник-иқтисодий асослар тайёр бўлганидан кейин маълум бўлишини айтганди.

“Ўзатом” ўтган йилги баёнотида АЭСнинг биринчи реакторини ишга тушириш 5 йилдан кейинга режалаштирилганини билдирганди.