Бўстонлиқда икки ёшли бола жарликка тушиб кетди

Қутқарувчилар болани тахминан 25 метр чуқурликдан олиб чиққан ва уни ота-онасига топширган.

Фото: Видеодан кадр

Тошкент вилояти Бўстонлиқ туманида жарликка тушиб кетган икки ёшли бола ФВВ ходимлари томонидан қутқарилди.

Қайд этилишича, 10 апрел куни соат 22:23 да Тошкент вилояти ФВБга Бўстонлиқ тумани «Яккатут» МФЙ ҳудудида икки ёшли бола йўқолиб қолгани ва у ўша ҳудуддаги жарликка тушиб кетган бўлиши мумкинлиги тўғрисида хабар берилган.

Хабарга асосан, айтилган манзилга зудлик билан Бўстонлиқ туманининг бир гуруҳ қутқарувчилари етиб борган.

Олиб борилган қидирув-қутқарув ишлари натижасида бола ўша ҳудуд яқинидаги жарликнинг тахминан 25 метр бўлган чуқурлигидан топилган ва юқорига олиб чиқилиб, соғ-саломат ота-онасига топширилган. «Ҳозирда боланинг аҳволи яхши», — дейилади хабарда.

Аввалроқ Тошкент вилояти ФВБ қутқарувчилари Бўстонлиқ тумани ҳудудидаги Катта Чимён тоғига сайр қилиш мақсадида бориб, йўлдан адашиб қолган уч кишига ёрдам кўрсатгани тўғрисида хабар берилганди.

#Бўстонлиқ #қутқарувчилар