Давлат хизматчиларига қўшимча тўловлар тўлаш механизмлари бекор қилиниши мумкин

Вазирлар Маҳкамасининг 8 апрел кунги қарори билан, “2025-2030 йилларда давлат молиясини бошқариш тизимини такомиллаштириш стратегияси” тасдиқланди.

Стратегияда давлат фуқаролик хизматчиларининг лавозим маошларини ягона принцип асосида шакллантириш кўзда тутилган.

Хусусан, давлат фуқаролик хизматчиларига давлат бюджети ва бюджетдан ташқари маблағлар, шу жумладан, давлат мақсадли жамғармалари ҳисобидан қўшимча тўловлар тўлаш механизмларини бекор қилиш назарда тутилмоқда.

Шунингдек, айрим турдаги давлат божлари, мажбурий йиғимлар, тўловлар, жарималар ва ажратмалар ҳисобидан шакллантириладиган вазирлик ва идораларинг бюджетдан ташқари жамғарма ҳисобварақларини қисқартириш тартибини белгилаш режалаштирилган.

Бу иккита масала юзасидан 2025 йил сентябргача норматив-ҳуқуқий ҳужжат лойиҳаси ишлаб чиқилади. Ижрочилар – Иқтисодиёт ва молия вазирлиги, вазирлик ва идоралар.

Ҳужжатга асосан, 2025-2030 йилларда давлат молиясини бошқариш тизимини такомиллаштириш стратегиясининг асосий мақсадлари қуйидагилар деб белгиланди:

• бюджет барқарорлигини таъминлаш ва интизомини кучайтириш орқали бюджет тақчиллигини қисқартириб бориш;
• бюджет очиқлигини таъминлаш;
• солиқ маъмурчилигини яхшилаш ва унинг самарадорлигини янада ошириш;
• бюджет харажатлари натижадорлигига эришиш;
• давлат қарзини макроиқтисодий хавфсиз даражада ушлаб туриш;
• давлат бюджети ликвидлилигини ошириш.

Стратегиянинг устувор йўналишларига қуйидагилар киради:

• бюджет интизомини таъминлаш механизмларини кучайтириш;
• ўрта муддатли бюджетлаштиришда стратегик устуворликни таъминлаш;
• давлат харажатлари ва инвестициларининг самарадорлиги ҳамда натижадорлигини ошириш.