Ван Гогнинг сўнгги картинаси билан боғлиқ суд можаролари якунланди

Нидерландиялик рассом Винсент Ван Гог ҳаётининг сўнгги соатларида чизган «Дарахт илдизлари» картинаси билан боғлиқ суд жараёнлари якунланди, деб хабар беради Euronews.

Маълумотларга кўра, Ван Гог «Дарахт илдизлари» картинасини Париж яқинидаги буғдой даласида ўз жонига қасд қилган кунда чизган. Овер-сюр-Уаздаги ушбу жой орадан 130 йилдан ошиқ вақт ўтиб, санъат оламидаги энг қизғин ҳуқуқий можаролардан бирининг марказига айланди.

2020 йилда Ван Гог ўзининг охирги картинасини Овер-сюр-Уаз қишлоғидаги боғда яратгани аниқланган. Боғ Добини кўчасидаги 48-уйда истиқомат қилувчи Жан-Франсуа ва Элен Серлингерга тегишли. Улар ҳозирда мазкур ҳудудни санъат ихлосмандлари учун экскурсия уюштирадиган масканга айлантирган (у ерга ташриф буюриш учун 8 евро тўлаш керак).

Аммо мэр Изабел Мезер ушбу майдон жамоат йўлининг бир қисми эканини таъкидлаб, суд жараёнларини бошлаган. Серлингерлар эса ерни 2013 йилда, унинг аҳамияти маълум бўлишидан анча олдин сотиб олганликларини билдирган.

Суд 2023 йилда эр-хотин фойдасига қарор чиқарган, энди бўлса, Версал апелляция суди ушбу қарорни тасдиқлаб, узоқ йиллик баҳсга якун ясади.

«Винсент Ван Гог картинасида тасвирланган дарахт илдизлари жойлашган қиялик жамоат йўлининг бир қисми ҳисобланмайди», — дейилади суд қарорида.

Қарор эълон қилинганидан кейин Мезер ижтимоий тармоқларда бунга эътироз билдириб, суд жараёнларини давом эттиришга ваъда берди: «Ушбу илдизлар товар эмас — улар Овер аҳолисига тегишли».

Нидерландиялик рассом асарида тасвирланган дарахт илдизлари Франциядаги Ван Гог институти илмий директори Ваутер ван дер Вин томонидан аниқланган эди. У картинада тасвирланган жой Овер-сюр-Уаз қишлоғининг бир чеккаси эканини пайқаб қолган.

Амстердамдаги Ван Гог музейи маълумотларига кўра, Ван Гог «Дарахт илдизлари» устидаги ишини туганган кун буғдой даласига чиқиб, тўппончадан ўз кўксига ўқ узган. У орадан икки кун ўтгач, 1890 йил 29 июлда вафот этган.