АҚШда 14 ёшли ўсмир юрак касалликларини саноқли сонияларда аниқлашга қодир иловани ишлаб чиқди

Америкалик ўсмир юрак касалликларини саноқли сонияларда аниқлашга қодир сунъий интеллект асосида ишловчи иловани яратди, деб хабар беради Oddity Central нашри.

Далласда яшовчи 14 ёшли ўсмир Сиддхартх Нандяла юрак касалликларига ташхис қўйишга мўлжалланган инновацион иловани ишлаб чиқди. Circadian AI номи остидаги дастур етти сония ичида смартфон микрофони орқали ёзиб олинган юрак уриши товушларини таҳлил қилган ҳолда юрак-қон томир патологиялари аниқлашга қодир.

Ёш ихтирочи аллақачон сунъий интеллект бўйича Oracle ва ARM компанияларининг сертификатига эга энг ёш мутахассис сифатида тан олинган. Унинг дастури АҚШда 15 мингдан ортиқ, Ҳиндистонда эса 700 нафар беморда синаб кўрилган ва ташхисларни 96 фоиз аниқликда қўйган.

Технология Ҳиндистоннинг Гунтур шаҳридаги Давлат умумий профил касалхонасида синовдан ўтказилган ва унинг самарадорлиги тасдиқланган. Ҳайдарободда бўлиб ўтган Сунъий интеллект бўйича Глобал саммитда Сиддхартх ўз иловасини аввало тиббий хизматдан чекланган ҳудудлар учун яратгани, бу жойларда тезкор ташхис инсонлар ҳаётини сақлаб қолиши мумкинлигини алоҳида таъкидлаган.

Ҳиндистоннинг Андҳра-Прадеш штати бош вазири ёш ихтирочи билан учрашувдан сўнг унинг фавқулодда салоҳиятини эътироф этган ва келгуси ишланмаларини қўллаб-қувватлашни ваъда қилган. Ёш бўлишига қарамай, Сиддхартх ўрта мактабни тамомлаган ва ҳозирда Даллас университетида компютер фанлари бўйича олий таълим олмоқда.