Қўшимча функционаллар
-
Тунги кўриниш
«Буюк ипак йўли» метро бекатига ногиронлиги бор шахслар учун электрон кўтаргичлар ўрнатилмоқда
Транспорт вазирлиги йил охиригача бу турдаги кўтаргичлар яна 16 та метро бекатига ўрнатилишини маълум қилди.
Фото: Видеодан кадр
Тошкент метрополитенининг «Буюк ипак йўли» бекатида ногиронлиги бор шахслар учун электрон кўтаргичлар ўрнатилмоқда, деб хабар қилди Транспорт вазирлиги матбуот хизмати.
Қайд этилишича, илгари шунга ўхшаш кўтаргичлар «Халқлар дўстлиги» бекатида пайдо бўлган. Йил охиригача улар яна 16 та метро бекатига ўрнатилади.
Шунингдек, вазирликнинг маълум қилишича, 2025 йил 31 мартда «Мустақиллик майдони» бекатида янги эскалатор ишга туширилган. «Пахтакор» ва «Ҳамид Олимжон» бекатларида эскалатор ўрнатиш ишлари якунланмоқда.
Бундан ташқари, «Буюк ипак йўли»да санитария хоналар очилган. Жорий йилда яна саккизта бекатда шундай хоналар очилади, «Амир Темур хиёбони», «Пахтакор» ва «Беруний»да ҳам бу борадаги ишлар якуний босқичда.
Аввалроқ Тошкент метросининг Юнусобод йўналишида FacePay орқали тўлов тизими ишга туширилгани тўғрисида хабар берилганди. Транспорт вазирлиги яқин орада ушбу тизим барча метро бекатларида жорий этилишини маълум қилган.
