3 апрел янгиликлари: Ўзбекистонда рўй берган муҳим воқеа ва ҳодисалар

Самарқандда Европа раҳбарлари билан учрашув, келгусида бойларга солинадиган солиқ, Белгиядан Ўзбекистонга қайтариладиган пуллар ва чигиртка тарқалишидан огоҳлантириш — ўтган кун давомида Kun.uz’да ёритилган долзарб ва муҳим Ўзбекистон янгиликлари билан таништирамиз.

Мирзиёев ЕИ етакчилари билан учрашди

Шавкат Мирзиёев Самарқандда Европа кенгаши президенти Антониу Кошта ва Европа комиссияси раиси Урсула фон дер Ляйен билан учрашди. Томонлар савдо, инвестиция ва логистика соҳаларида ҳамкорликни кенгайтиришга келишиб олди.

Музокарада 30 млрд евролик қўшма лойиҳалар портфели, Европа тикланиш ва тараққиёт банки ва Европа инвестиция банки билан муносабатлар муҳокама қилинди. Кенгайтирилган шериклик битими тайёрланаётгани таъкидланди.

Европа раҳбарлари Ўзбекистондаги ислоҳотлар ва минтақада яхши қўшничилик сиёсатига юқори баҳо берди.

Учрашувда «яшил» энергетика, рақамлаштириш, қишлоқ хўжалиги ва таълим соҳаларида ҳамкорлик истиқболлари муҳокама қилинди. «Марказий Осиё – Европа Иттифоқи» саммити ва «Глобал дарвоза» стратегияси кун тартибига алоҳида эътибор қаратилди.

Эслатиб ўтамиз, Самарқанд шаҳрида «Марказий Осиё – Европа Иттифоқи» биринчи саммити ва Халқаро иқлим форуми бўлиб ўтади. Аллақачон қўшни давлатлар президентлари ҳам саммит ва форумда қатнашиш учун Самарқанд шаҳрига етиб келишган.

Бойларга солиқ: алоҳида тизим ишлаб чиқиляпти

Ўзбекистонда энг юқори даромадли фуқаролар учун солиқ ундириш бўйича махсус тизим жорий этилиши режалаштирилмоқда. Бу ҳақда Солиқ қўмитаси раисининг биринчи ўринбосари Мубин Мирзаев маълум қилди.

Унга кўра, 18 млн нафар фуқаро даромад олувчи ҳисобланади ва улар орасида даромади юқори бўлганлар алоҳида назоратга олинади. Яратилган электрон база орқали солиқдан қочишнинг олди олинади.

Янги тизим чет элда топилган даромадларни ҳам қамраб олади. Қўмита бу тизимни ишга тушириш учун тахминан бир йил муддат керак бўлишини айтди.

Белгия 108 млн долларни Ўзбекистонга қайтармоқчи

Белгия ҳукумати коррупция ва пул ювиш билан боғлиқ жиноятлар доирасида мусодара қилинган 108 миллион долларни Ўзбекистонга қайтаришга тайёргарлик кўрмоқда. Брюссел прокуратураси Ўзбекистон ҳукуматининг илтимоси асосида 200 миллион долларлик активларни мусодара қилган. Бу маблағлар кимдан олингани ёки қайси жиноят иши доирасида экани очиқланмаган.

Прокуратура баёнотига кўра, бу халқаро ҳуқуқий ёрдам сўрови БМТнинг Коррупцияга қарши конвенцияси асосида амалга оширилган. Брюссел суди ЕИ давлатлари ўртасидаги активлар тақсимоти қоидалари асосида 108 миллион долларни Ўзбекистонга беришга қарор қилган.

Аввалроқ, Адлия вазирлиги Гулнора Каримовага алоқадор жиноий гуруҳнинг Белгиядаги активлари юзасидан ишлар олиб борилаётганини билдирган эди. Ҳозирда 1,3 миллиард долларлик активларни қайтариш бўйича кенг қамровли ҳаракатлар давом этмоқда.

Ўзбекистонда чигиртка тарқалиш хавфидан огоҳлантириш

Ўсимликлар карантини ва ҳимояси агентлиги 2025 йилда 608,1 минг гектар ерда чигиртка тарқалиши кутилганини маълум қилди. Айни пайтда Қашқадарё, Сурхондарё ва Самарқанд вилоятларида зарарли чигирткаларга қарши кураш ишлари олиб борилмоқда.

22 мартдан буён 5468 гектар майдонда кимёвий тадбирлар амалга оширилган. Бу ишларда 30 та отряд ва 276 мутахассис иштирок этмоқда. Жиззах вилоятида ҳам кураш ишлари бошланган.

Ўзбекистонда чигирткаларнинг 200 га яқин тури бор, улардан 6–8 тури ҳосилга катта зарар етказиши мумкин.

Oman Air Тошкентга мунтазам қатновларни йўлга қўяди

Oman Air авиакомпаниясига Масқат–Тошкент–Масқат йўналишида мунтазам парвозлар амалга ошириш учун расмий рухсатнома берилди. Бу ҳақда «Ўзавиация» агентлиги хабар берди.

Рухсатнома 2025 йил 2 апрел куни расмийлаштирилган ва Ўзбекистон ҳамда Уммон ўртасидаги ҳаво қатнови тўғрисидаги ҳукуматлараро битим асосида тақдим этилган.

Мазкур рейслар икки мамлакат ўртасида туризм, савдо ва ишбилармонлик алоқаларини ривожлантиришга хизмат қилиши кутилмоқда.

2 ойда 4,4 мингдан ортиқ авто импорт қилинди

Ўзбекистон 2025 йилнинг январ-феврал ойларида хориждан 4 415 та енгил автомобил импорт қилди. Буларнинг умумий қиймати 75,9 млн долларни ташкил этди.

Миллий статистика қўмитасига кўра, автоимпортда асосий улуш Хитойга тўғри келган — 3149 дона. Шунингдек, Корея Республикасидан 1191 дона, Япониядан 32, Германиядан 11, АҚШ ва Мексикадан 8 тадан авто олиб кирилган.