Фан-техника | 08:38 / 01.04.2025
2968
2 дақиқада ўқилади

Соғлом умрни узайтиришнинг тўрт асосий усули айтилди

Узоқ ва соғлом яшашнинг тўрт таянч омили бу — касалликларни эрта аниқлаш, юрак-қон томир ва метаболик саломатликни яхшилаш, яллиғланишларга қарши кураш ҳамда когнитив ва жисмоний бардошни сақлаш ҳисобланади. 

Фото: rbc.ua

Бу ҳақда WellnessPulse нашрига америкалик иммунолог ва оилавий шифокор доктор Ҳелен Мессйе маълум қилди.

Табибнинг тушунтиришича, соғлом умрни узайтириш учун мунтазам равишда қон босими, қондаги шакар ва холестерин миқдори, оғирлик ва бел айланасини кузатиб бориш керак. Ушбу кўрсаткичлардаги ўзгаришлар турли патологияларнинг илк белгиларини ўз вақтида аниқлашга ёрдам беради. Шунингдек, шифокор мунтазам тиббий кўрикдан ўтиш муҳимлигини таъкидлади.

«Энг муҳим кундалик одатлар — бу ҳар кунлик жисмоний фаоллик, сифатли уйқу, тўйинтирувчи овқатланиш, стрессни назорат қилиш ва доимий мулоқот. Бу саломатликка доир барча соҳалардаги изчиллик узоқ муддатда йиғиладиган ижобий таъсирга эга», — деб тушунтирди шифокор.

Маълум қилинишича, тўғри овқатланиш антиоксидантлар мавжуд бўлган маҳсулотларни рационга қўшишни талаб қилади. Антиоксидантлар — бу тананинг ҳужайраларини фаол кислород шакллари ва яллиғланишдан ҳимоя қилувчи табиий моддалардир. Уларнинг манбалари — чой, қаҳва, мевалар, сабзавотлар, какао маҳсулотлари, шунингдек, фойдали ёғлар — балиқ ва ёнғоқлардир.

Жисмоний фаоллик ва бардошни сақлаш, юрак хасталиклари, семириш ва қандли диабетнинг олдини олиш учун куч машқлари, пиёда юриш, велосипед ҳайдаш ва сузиш тавсия этилади. Қўшимча равишда йога машғулотлари эса инсоннинг эгилувчанлик ва мувозанат қобилиятини ривожлантиради. Бу хусусан кекса ёшдагилар учун муҳим, чунки айнан шу фазилатлар йиқилиш ва суякни синдириб олиш хавфини камайтиради.

Мавзуга оид