Путин АҚШ ва Украинанинг 30 кунлик оташкесим таклифига рози бўлди

Бир неча кун аввал Арабистонда АҚШ ва Украина делегацияси учрашиб, Киев 30 кунлик ўт очишни тўхтатиш режимига рози бўлгани айтилганди. Ўшанда АҚШ давлат котиби Марко Рубио «энди тўп Россия томонида» эканини айтганди. Бугун Кремлда бу таклифга рад жавобини беришди. Бирой кечга бориб Александр Лукашенко билан матбуот анжуманида қатнашган Путин бу таклифга рози бўлди.

Трампнинг махсус вакили Москвага келди

АҚШ президентининг махсус вакили Стивен Уиткофф Москвага борди. Олдинроқ унинг самолёти Доҳадан Москвага учгани хабар қилинганди. Трампнинг вакили Қатарда ҲАМАС ва Исроил ўртасидаги музокараларда ҳам иштирок этган. Москвада Уиткофф Россия президенти Владимир Путин билан учрашиши кутилмоқда.

Ню-йорклик қурувчи, миллиардер Уиткофф Трампнинг Яқин Шарқ масалалари бўйича махсус вакили ҳисобланади. АҚШ президентининг Россия ва Украина масалалари бўйича бутун бошли махсус вакили ҳам бор эди, бироқ Москвага Кит Келлог эмас, Стив Уиткофф келди. Олдинроқ ОАВда Кит Келлог уруш бўйича музокаралардан четлаштирилгани ҳақида хабар чиққанди.

Кремл 30 кунлик сулҳга қарши

Россия президентининг ташқи сиёсат бўйича маслаҳатчиси, амалда мамлакатнинг ташқи сиёсат бўйича асосий одами ҳисобланган Юриш Ушаков Кремл вақтинча сулҳни қабул қилмаслигини айтди.

«Бу украиналик ҳарбийлар учун нафас ростлаш учун имкон беришдан бошқа нарса эмас. Бизнинг мақсадимиз қисқа муддатли эмас, узоқ тинчликка эришиш. Ўзини тинчликка интилаётгандек кўрсатиш керак эмас», деган Уиткофф Олга Скабеевага берган қисқа интервюсида.

«Россия 1» телеканали бошловчиси Путиннинг маслаҳатчисидан бу гапингизни Кремл келишувни рад этди деб талқин қилсак бўладими, деб сўради. Ушаков эса йўқ, бу борада президенти Путин бугун матбуот анжуманида алоҳида чиқиш қилади, деди.

Путиннинг маслаҳатчиси бу Кремлнинг позицияси эмас деб айтмоқда, лекин табиийки у Путиннинг рухсатисиз бундай гапни айтолмайди.

Украина президенти Володимир Зеленский дунё Россиядан сулҳ бўйича ҳамон жавоб олмагани, бу эса Москва урушни тугатишни истамаслигидан далолатлигини айтди.

Дарвоқе, бугун Москвада Путин Беларус президенти Александр Лукашенко билан учрашди. Россия президенти муҳим қарор қабул қилиш олдидан дўсти Лукашенко билан маслаҳатлашишни яхши кўради. Учрашув якунлангач матбуот анжуманида қатнашган Путин 30 кунлик оташкесимга розилиги, лекин унинг шартларини келишиб олиш кераклигини айтди.

Ўткир Жалолхонов тайёрлади
Тасвирчи ва монтаж устаси – Жаҳонгир Алибоев