Швеция Қуръонни ёқиб юборган Момика ўлимида гумон қилинганларни озод этди

Мамлакат прокурори гумондорларни ушлаб туриш учун сабаб йўқлигини айтди. Момика қотилини излаш жараёни давом этади.

Фото: Getty images

Швеция прокуратураси Қуръонни ёқиб юбориш тадбири ташкилотчиси Салвон Момика ўлимида гумон қилинаётган беш нафар шахсни озод этди, деб хабар берди AP.

«Уларнинг жиноят содир этганига гумон заифлашди, энди одамларни ҳибсда ушлаб туриш учун ҳеч қандай сабаб кўрмаяпман», деди юқори даражали прокурор Расмус Оҳман.

Прокуратуранинг аниқлик киритишича, улардан гумон олиб ташланмаган, ҳуқуқ-тартибот идоралари ходимлари қотиллик ортида ким турганини аниқлашда давом этмоқда.

Ироқлик мигрант Салвон Момика 29 январ куни Сёдертелйе шаҳридаги турар-жойлардан бирида отиб ўлдирилди. У аввалроқ, Қуръонни ёқиб юбориш билан боғлиқ бир қанча оммавий тадбирларни уюштирган эди. Тадбирлар маҳаллий полиция рухсати билан амалга оширилди. Ироқ ҳукумати Швециядан Момикани экстрадиция қилишни сўради, аммо рад жавобини олди. Ўнлаб ироқликлар Бағдоддаги Швеция элчихонаси олдида норозилик намойишини ўтказди.

#Ироқ #Швеция #Салвон Момика