Коронавируснинг икки хил мутацияси аниқланди

Хитойдаги Пекин университети, Шанхай Пастер институти ва Хитой Фанлар академияси олимлари Уҳан шаҳрида пайдо бўлган ва қисқа муддатда дунёга ёйилган коронавируснинг (Covid-19) S-cov ва L-cov деб номланган иккита бир-биридан фарқли мутацияси мавжуд эканини аниқлашди.

Пекин университети ва Хитой Фанлар академиясида ишлайдиган олимлар томонидан ўрганила бошланган коронавирус мутацияга учрагани маълум қилинди. National Science Review журналида чоп этилган тадқиқотда коронавирус мутацияга учрагани ва иккига бўлингани ҳамда бу мутациялар S ва L деб номлангани айтилган.

Коронавируснинг биринчи тарқалган турига яқин бўлган ва кам юқумлилик хусусиятига эга бўлган S-cov’дан фарқли ўлароқ, вируснинг иккинчи тури L-cov юқори даражадаги юқумлилик хусусиятига эга бўлиб, нафас олиш тизимига кўпроқ зарар келтириши маълум қилинди.

Вирусни юқтирганларнинг 30 фоизида S-cov, 70 фоизида эса L-cov кузатилган. Коронавируснинг учинчи мутацияга учраш эҳтимоли ҳам йўқ эмас.

• Сўнгги маълумотларга кўра, бутун дунёда жами 85 мамлакатда вирусдан зарарланганлар сони 97 942 нафарни ташкил этмоқда, 3383 киши вирус қурбони бўлган, 55 185 киши соғайиб кетган.
• 5 март маълумотига кўра, Эронда 3513 кишида вирус аниқланган, 107 киши оламдан ўтган.