Zelenskiy: Rossiya Ukrainaning qishga tayyorgarligini buzishga urinmoqda

Ukraina prezidenti Volodimir Zelenskiy Rossiyani mamlakatning yaqinlashib kelayotgan isitish mavsumiga tayyorgarligini buzishga urinishda aybladi. Rossiya kuchlari Odessa viloyati janubidagi Novoselskoye qishlog‘idagi gaz stansiyasiga zarba berib, yuzlab oilalarni gazsiz qoldirdi, dedi Ukraina rahbari Telegramʼda.

«Bu bizning isitish mavsumiga tayyorgarligimizga ataylab qilingan hujum, Rossiyaning energetika sohasiga qilgan har bir hujumi kabi mutlaqo qabul qilib bo‘lmas holat bo‘ldi», dedi u. Bundan tashqari, rossiyaliklar Dnipropetrovsk viloyatidagi elektr tarmoqlariga hujum qildi, Xersondagi odamlarni dronlardan nishonga oldi, Xarkiv va Donetsk viloyatlarida shaxsiy uylarni o‘qqa tutdi, dedi Zelenskiy. Shuningdek, u Rossiyaning Zaporijjya viloyatidagi dam olish markaziga bergan zarbasi natijasida ikki kishi halok bo‘lganini ma’lum qildi. «Bu zarbada harbiy ma’no yo‘q. Qo‘rqitish uchun faqat shafqatsizlik», — deya qo‘shimcha qildi u.

AQSh maxsus elchisi Stiven Uitkoffning Moskvaga tashrifi kuni e’lon qilingan postida Ukraina prezidenti o‘z mamlakatiga qarshi urush boshlagan Moskvaga bosimni kuchaytirish zarurligini ta’kidladi. «Hozirda AQSh, Yevropa va "yettilik" arsenalidagi barcha dastaklarni kuchaytirish juda muhim, bu sulh haqiqatan ham darhol yuz berishi uchun kerak. Ukraina siyosiy irodani ko‘ryapti, sheriklarimiz, Amerika va yordam bergan barchaning sa’y-harakatlarini qadrlaydi. Va biz kerakli qarorlarga ishonamiz», — dedi Zelenskiy.

Avvalroq Stiven Uitkoff Rossiya rahbariyati bilan muzokaralar o‘tkazish uchun beshinchi tashrifi bilan Moskvaga keldi. Maxsus elchining Rossiyaga tashrifi haqida avvalroq rossiyalik hamkasbi Vladimir Putinga Ukrainadagi urushni tugatish choralarini ko‘rish uchun 10 kun muhlat bergan AQSh prezidenti Donald Tramp e’lon qilgan edi. Uning so‘zlariga ko‘ra, Moskva Uitkoffni «ko‘rishni xohlagan». «Ular uni uchrashuvga taklif qildi. Demak, bundan nima chiqishini ko‘ramiz», — degandi Tramp.