Reuters: Tramp fikriga qo‘shilmagan AQSh amaldorlari ta’qib qilinmoqda

AQSh prezidenti Donald Tramp ma’muriyatining yuqori lavozimli amaldorlari bilan bog‘langan American Accountability Foundation (AAF) o‘ng guruhi 175 ga yaqin federal xodimlarning ismlari, fotosuratlari va shaxsiy ma’lumotlarining onlayn ro‘yxatini e’lon qildi va ularni «radikal» so‘l g‘oyalarni, xususan, xilma-xillik, tenglik va inklyuziya (DEI) konsepsiyasini targ‘ib qilishda aybladi. Shundan so‘ng, ro‘yxatdagilar ommaviy qo‘rqitish va ta’qiblarga duchor bo‘ldi. Ba’zilari ishdan bo‘shatildi. Ikki nafari o‘z xavfsizligidan qo‘rqib, chet elga ko‘chib ketdi. Bu haqda Reuters agentligining 7 avgust, payshanba kuni chop etgan surishtiruvida aytiladi.

Ro‘yxatdagi ba’zi odamlar respublikachilar va demokratlar ma’muriyatlarda uzoq vaqt ishlagan. Aksariyat shaxslar ommaga oshkor bo‘lmagan davlat lavozimlarida mehnat qilgan.

AAF'ning o‘zi asta-sekin sobiq prezident Jo Bayden atrofidagi muxolifatni ta’qib qilishga qaratilgan tashkilotdan dushmanlarni yo‘q qilish uchun Tramp kampaniyasining vositasiga aylandi.

AAF ro‘yxatidagilarning yarmi — kamida 88 kishi — hukumatni tark etgan yoki ma’muriy ta’tilga chiqishga majbur bo‘lgan. Ba’zilari ishdan bo‘shatildi, boshqalari ishdan bo‘shatish yoki boshqa lavozimga o‘tkazish tahdidi ostida o‘zi ketgan.